Сылне йӱкан самырык мурызо ныл-вич ий ончыч икымше гана сценыш лектын гынат, калыклан моткоч палыме лийын шуктен. Тудын шӱшпыкын гай йӱкшӧ, порын, волгыдын шыргыжалын муралтен колтымыжо кумылым нӧлта, муралтен, тавалтен колташ тарата. Тудо ик ий ончыч Йошкар-Олаште юристлан тунем лектын, тыгодымак Моркысо тӱвыра полатыште методистлан пашам ыштен. А кызыт «Жилкомсервисыште» пашам ышта гынат, калыкым сылне мурыжо-влак дене куандарыде ок чыте.
Лаштыкнан тачысе унаже – Морко районысо Кӱшыл Кожлаер ялыште шочын-кушшо Лилия Петухова. Лилия Петухован мурыжым тыште колыштын кертыда.
— Лилия, икымше гана кугу сценыш могай муро дене лектынат?
— Кугу сценыш икымше гана Йошкар-Олаште Марий Эл радион эртарыме «Идалыкын мурыжо-2011» фестивальыште «Йолташемлан» муро дене лектынам. А тыгеже изиэм годсекак калык ончылно мастарлыкым ончыкташ келша. Тунемме годым тӱрлӧ пайремыште, конкурсышто, Колумб, Казаков лудмаште монь почеламутым эреак лудынам. Сылнын йоҥгалтарыме дене районыштат, республикыштат сеҥыше-влак радамыш шуко гана логалынам. Марий йылме, марий калыкын историйже предметла дене олимпиадыште уш-акылым тергенам.
— Репертуарет кугу?
— Тачысе кечылан лу утла мурем уло. Но эше ятыр мурсаскалан семым возаш кӱлеш. Южо автор-влак шкештак мылам почеламутыштым пуат. Репертуарыштем чылажат самодеятельный композитор-влакын мурышт улыт. Нунын кокла гыч эн шукыжым, мутат уке, ачам возен. Ончыкыжым профессионал композитор-влак дене пашам ышташ шонымаш уло.
— Кызыт опытан мурызо-влак пелен концерт дене коштат. Нунын коклаш кузе логалынат?
— Ныл-вич ий ончыч Параньга районысо Осиял калыкын йодмыж почеш Володя Матвеев мыйым концертыште мураш ӱжын. А тиддеч вара кеч-кушкат эре пырля коштынна. А кызыт Анатолий Зарецких, Эльвира Трифонова, Володя Матвеев эн ӱшанле йолташем улыт. Нунын дене мутланашат куштылго, ой-каҥаш денат полшаш ямде улыт.
— Тый юристлан тунем лектынат. А ончыкыжым музыкальный образованийым налаш шонымаш уло?
— Лийын тыгай шонымаш. Палантай лӱмеш тӱвыра да сымыктыш колледжыш заочно тунемаш пураш шоненам ыле. Но варажым тыгайжым петыреныт манын ойленыт. А кызыт пашам ыштем, очно тунем шукташ ок лий.
— Ындыжым пелашет гастроль дене кошташ чаракым ышташ ок тӱҥал?
— Уке, шонем. Кертмыж семын шуко гана концертыш пырля миен. Тудлан тиде келша. Алеша пелашем — мыйын икымше аклышем. Кунам тудо пеленем, чонемланат ласка, эҥертыш шижалтеш.
18 июльышто Кӱшыл Кожлаер ӱдыр Лилия Петухова ден Йошкар-Оласе рвезе Алексей Боголюбов ешым чумыреныт. Меат нуным сӱан кечышт дене шокшын саламлена да пеҥгыде тазалыкым, ӱмыр мучко икте-весым йӧратен, пагален шуко ий илаш тыланена. Йӧратымаш тулда нигунамат ынже йӧрӧ.
Алевтина Байкова мутланен,
«Марий Эл» газетын сайтше гыч налме материал