Марий Эл Радиолан индеш ий 1-ше июльыштак темын гынат, радио тиде пайремым коло кудымшо июльышто «Келшымаш» («Дружба») стадионышто эртарен.
Марий Эл Радио шке пашажым 2005 ий 1-ше июльышто тӱҥалын. Икымше гана эфирышке Мурызо Эчан (Александр Кожевников) лектын. Тачысе кечылан радиошто Александр Курмузаков, Наташа Пушкина, Володя Матвеев, Марина Глушкова, Валерий Очеев, Ирина Якаева, Александр Кожевников, Владимир Аптулаев, Александр Кожевников, Михаил Пирогов да Сергей Карпов тыршат. 
Радиом таче ятыр тӱжем ешыште эр гыч кас марте колыштыт. А кушто гына радион йӱкшӧ огеш шокто: мӧҥгыштӧ, пашаште, машина дене кудалме годым, сад-пакчаште, эсогыл тӱрлӧ-тӱрлӧ предприятийыштат Марий Эл Радион йӱкшӧ йоҥга. Эфирыште тӱрлӧ виктышыште, сферыште тыршыше еҥ-влак дене программым колышташ лиеш, вӱдышӧ-влакат калыклан оҥай программым ямдылаш тыршат, эфирыште тӱрлӧ сынан марий муро йоҥга, оҥай конкурс-влак эртаралтыт.
Марий Эл Радио пӱтынь марий кундемым авалта, но радиом вес эллаштат интернет полшымо дене колыштыт. Мутлан, мемнан сайтыштат Марий Эл Радиом колыштын сеҥеда. Радио марий сынан CD, mp3, DVD диск-влакым калыклан темла.
Калыкыште Марий Эл Радио тӱрлӧ концертым эртарыме дене палыме. 2010 ий гыч «Идалыкысе муро» концерт-фестивальым, Пеледыш пайремыште марий танцполым эртарат. Тыгак ятыр ий районлашке тӱрлӧ сынан концерт-программе дене лектын коштедат. Ынде индеш ий кажне кеҥежым калыкым Йошкар-Оласе стадионлаште чумырат: ончыч «Строитель» стадионышто погыненыт, калык шуко погынымылан кӧра, пытартыш ныл ий «Келшымаш» стадионышто марий шӱлыш озалана. Теве теният тыгай пайрем 26 июльышто «Келшымаш» стадионышто эртыш. Радион коллективше кажне ийын концертым ойыртемалтшым ышташ тырша. Тений гын, «Ший аршаш», «Весела кова-влак», «Визым вел», «Кугезе кумыл» марий ансамбль-влак толыныт. Концертын форматше сценарий, тыгак мурызо-влакын репертуарышт деч шога. Сценарийым возышо Наташа Пушкина чылажымат шотыш налаш тырша, вет концертышке кугужат-изижат,   сем тӱняште у направлений дене мурышо, калык деч лекше мурызат, сулло артист-влакат толыт.
Марий Эл Радион концертше нерген ик уверыште, материалыште возен, каласкален, ончыктен пытараш огеш лий, но иктым пеҥгыдын ойлаш лиеш, концерт, ончышо-влакын чоныштышт, ушыштышт шукылан кодеш. Толшо калык концерт шӱлыш дене эше ик ий тыге илаш тӱҥалеш, очыни. Вет арам огыл, радиовӱдышӧ, мурызо, ансамбль-влак калыкын кумылыштым ныл шагат наре нӧлтеныт.

Автор: Николай Любимов
Фотограф: Пётр Васильев

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.