16 августышто мотор да сылне кечын, У Торъял районысо Токтарсола ял шке 220 ияш лӱмгечыжым палемдыш. Тиде кечынак ял пурымашке Токтар Онарлан палым (стеллым) почыныт.
Стеллым почмашке ял калык гына огыл, тыгак тӱрлӧ виктышыште, сферыште тыршыше еҥ-влак У Торъял районысо администрацийым вуйлатыше Блинов Василий Васильевич, Тошто Торъял ял шотан илем администрацийым вуйлатыше Широбоков Николай Иванович, У Торъял район администрацийым вуйлатышын алмаштышыже Волков Денис Николаевич, Марий Эл Республикын кугыжаныш погынын депутатше Новиков Аркадий Арсеньевич, марий калык конгрессын вуйлатышын алмаштышыже Куклина Эльвира Викторовна, У Торъял землячествым вуйлатыше Наумов Виктор Андреевич, сантехремонт организацийым вуйлатыше Пузырников Владимир Анатольевич толыныт. Токтарсола вер-шӧрлан палым почмек, яллан 220 ий темме лӱмеш калык ял пайрем палемдаш тӱҥале. 

Проектын авторжо, Небогатиков Евгений Викторович Токтарсола ялын старостыжо улеш да верысе школым вуйлата. 2011 ийыште Даниил Ильич Онарлан школ пырдыжышке мемориал оҥам шогалтыме ыле, а тений стеллым. «Тиде проектым возаш, илышышке шыҥдараш кок ий ончычак шонымаш шочын. Палым ыштыме годым марий сӱретче Иван Ямбердов дене каҥашымаш эртен, ятыр еҥ шийвундо дене полшен», — каласкала Евгений Викторович Небогатиков.
Токтарсола ял 1794 ийыште шочын, негызым яллан Токтар лӱман пӧръеҥ пыштен. Тачысе кечылан Токтарослаште 121 пӧрт уло, 424 еҥ ила, ялым нӧлта. Пайрем годым эн сылне пӧрт, эн илалше ден эн самырык, уста, эн пашаче еҥ-влакым палемдышт. А ял пайрем эртыме годым эре сылне, ныжыл марий сем йоҥген – концерт эртен. Концертым мурызо-влак — Татьяна Фоминых, Николай Любимов, Алёна Таныгина, Елена Желонкина, Ольга Богачёва, куштызо Екатерина Куклина да «Ош йӱксӧ» ансамбль сӧрастареныт. Пайрем марий дискотеке дене мучашлалтын тыште Татьяна Фоминых, Вадим Краснов, Виктория Тихонова да Артур Ефремов муреныт.

Автор: Николай Любимов, марий блоггер,
«Кидшер» сайтын тӱҥ редакторжо

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.