16 августышто Калтаса селаште Сабантуй пасушто эрвелмарий-влакын куштымашыштым чапландарыше «Ший кандыра – 2014» фестиваль эртен. Эрвелмарий-влакын «кандыра» куштымашышт – ик эн оҥай да ойыртемалтше куштымаш. Куштымаш, кызытат кумдан палыме, тудо икмыняр километрлан шуйналтын кертеш да, куштымашыште тӱжем дене еҥ ушнен кертеш.
Икымше гана «Ший кандыра» пайрем 2011 ийыште июльышто эртаралтын. Кодшо ийын «Ший кандыра» фестиваль кокымшо гана эртыш. Каласен кодыман, марий-влак 2300 метр кужытан кандырам «пидыныт», тӱнямбал рекорд шындалтын. Тиде куштымаш «Эн кужу эрвелмарий куштымаш» номинацийыш логалын.  Ты рекордым пеҥгыдемдыме семын Рекорд да достижений-влак тӱнямбал агентствын президентше Галина Свищук Калтаса район администрацийым вуйлатыше Юрий Садыровлан сертификатым кучыктен ыле.
А тиде ийын Пошкырт, Татарстан, Удмуртий, ХМАО кундем гыч самодеятельный 24 коллектив таҥасеныт.
«Ший кандыра – 2014» фестивальышке марий-влак гына огыл, тыгак тӱрлӧ виктышыште, сферыште тыршыше еҥ-влак Пошкырт Республикын тӱвыра печать да калык-влакын паша шотышто министрын икымше алмаштышыже Валентина Владимировна Латыпова, Юлия Николаевна Герасимова – Пошкырт Республикысе финн-угор калык-влакын председательышт, Лариса Николаевна Яковлева – Кугыжаныш Думын депутатше, Булат Гумерович Юмагулов – Пошкырт Республикысе Адвокат палатын президентше. Галина Степановна Ширяева – Марий Эл Республикысе тӱвыра печать да калык-влакын паша шотышто министрын алмаштышыже да тулеч моло-влак погыненыт.
Кажне гаяк коллектив марий калыкын усталык поянлыкшым почын пуаш тыршен. Иктешлымашым ыштымек I верым Бабаево да Василово ял гыч коллектив-влак сеҥен налыныт, II верым Калмиябаш да Калмаш ял гыч ансамбль-влак, III верым – Кугу Куразово, Кильбахтино, Тошто Яш ял-влак гыч делегаций-влак ойыреныт. Сеҥышышке-влакым пӧлек да чап танык дене палемденыт.
«Кандыра» – чыла еҥым, тӱрлӧ тукымым иктышке чумыра. Вет арам огыл, куштымаш марий калыкын поянлыкшым тидын годымак калыкын проста улмыжым почын пуа. «Ший кандыра» пайрем «кандыра» куштымашым аралымаште, сай йӧнлан шотлен кертына.

Автор: Николай Любимов, марий блоггер,
«Кидшер» этнокультурный сайтын тӱҥ редакторжо

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.