Марий кундемыште кушшо кушкыл кокла гыч кызытеш икымше верыш кечалтше куэ, кокымшыш ландыш, кумшыш лӱмегож, нылымшыш ковыштапеледыш ден пӱкшерме лектыныт. Молан кызытеш йодыда? Россий Федерацийын Пӱртӱс поянлык да экологий министерствыже, Йырым-йырым аралымылан полшышо «Природа» фонд кеҥеж тӱҥалтышак «Российын аллейже» акцийым увертареныт ыле. Йӱклымаш 1-ше сентябрьыште мучашлалтшаш ыле, но тудым 1-ше ноябрь марте шуйымо. Элнан чыла 85 субъектыштыже кажне регионжын шкенжын ужар символжым ойырышаш улыт. Эшежым тиде акцийын лектышыж почеш Севастопольышто «Российын аллейже» пӱртус паркым ыштат да тушто кум гектар кумдыкышто элнан чыла климатический поясшылан келшен толшо пушеҥге-влакым шындат. Вӱд, курык, тӧр да чодыра площадкылаште 85 изи сад лийшаш! Тудым 2015 ийыште почшаш улыт. Варажым нине кушкылым эколого-просветительский проектлаштат кучылташ тӱҥалыт.
Тиде амал денак Марий Элыштат тудын ужар символжым ойыраш полшышо онлайн-йӱклымаш эрта. Варажым ойырен налме кушкылымат тиде аллейыш вераҥдат.
Тидын шотышто республикыште посна пашаче группо ышта. Калыклан ойырен налаш вич кушкыл темлалтын: куэ, лӱмегож, пӱкшерме, ландыш да ковыштапеледыш. Нунын кокла гыч иктыжым тӱшка калык ойырышаш. 1 ноябрь марте жап шагал кодын, сандене шке йӱкдам пуаш аллеяроссии.рф сайтышке пурыман.
Конкурсын оргкомитетше кажне регион гыч темлыме кушкыл-влакым туге ойырен налыт, икте-весыжым ушештарышаш огытыл. Мутлан, Марий Эл гыч пашаче группо лучко кушкылым темлен, но оргкомитет визытым гына ойырен налын. Туге гынат лач мемнан кундемлан келшен толшо кушкыл-влак ты радамыш логалмыла чучеш: кажныже ойыртемалтше, шкешотан, поян историян, калыкнан илышыштыже могай-гынат верым айла. Лӱмегожымак налаш, марий калыкын аралтыш кушкылжо манаш лиеш. Пӱкшерме шке жапыште калыклан шужен илыме пагытымат куштылемдаш полшен. Куэ пу, куэ вӱд, куэ выныьк — ял калыкын илышыжым тудын деч от ойыро… Ландыш, ковыштапеледыш калыкнан илышышкыже моторлыкым пуртат.
Уло Российысе калык тиде акцийыш кумылын ушнен. Южо иктыжын йодыш лектын кертеш, молан тыгай конкурс, парк кӱлыт. Тидлан оргкомитетын еҥже-влак тыгерак вашештат: онлайн-йӱклымаш, акций тӱрло кундемыште илыше калык, еҥ, регион-влак коклаште кылым пеҥгыдемдат. Тидын лектышыже парк веле огыл лиеш, тӱҥжӧ — сай шонымаш, икте-весе дене мутланымаш, шкенан элнан пӱртӱс поянлыкшым чапландарымаш…
Марий Элыште ойырен налме кушкыл-влакым Севастопольыш наҥгаяш да шындаш ситышым Юл кундемысе технологический университетын ботанический садше ойыраш ямдылалтеш. Тушто тидлан ямде улыт.
Лекше йодышым +7 (945) 642 32 83 телефон да info@naturefund.ru электрон почто дене рашемдаш лиеш!