Пургыж тылзын коло кудымшо кечынже чапланыше марий поэт да РСФСР-ын сулло туныктышыжо Василий Яковлевич Рожкинын шочмыжлан шӱдӧ ий теме. Василий Яковлевич Рожкин Советский район Кӱшыл Кадам ялыште шочын-кушкын. Шӱмжӧ 1983-шо ий 9 май – Сеҥымаш кечын – кырымым чарнен. Лачшымак пургыж тылзын коло визымше кечынже Советский район Кадам тӱҥ школышто Василий Яковлевич Рожкинлан пӧлеклалтше лудмаш да шарнымаш кас эртаралтын. Мероприятий тӱҥалтышыште Кадам школышто марий йылмым да литературым туныктышо Зоя Александровна Беляева Василий Рожкин илыш-корныжым каласкалыш, тыгак поэт нерген «Патырлык корно. Василий Рожкин – поэт, салтак, туныктышо» у книга дене палдарыш. Василий Рожкинын шочмыжлан 100 ий темме лӱмеш тудым Гельсий Зайниев ямдылен. Каласен кодыман, Зоя Александровна тиде мероприятийым пеш чаплын ямдылен. Василий Яковлевич Рожкинлан пӧлеклалтше лудмаш конкурсышто Советский районын тунемше да туныктышо-влак сылне почеламутым йоҥгалтарышт. Палемдыман, ятыр почеламутым сар темылан лудыч. Йоча-влакын лудмышт чонышкак логале – илыш нерген шонаш таратыш. Конкурсышто тунемше-влак коклаште: Полушина Ксения, Сидорова Татьяна, Бирюков Евгений, Рябинина Оксана да Фоминых Елена почеламутым пеш сылнын лудыч. Туныктышо-влак коклаште: Иванова Надежда Дмитриевна, Ямтеева Вера Григорьевна да Беляева Зоя Александровна лудыч.
Кастене верысе клубышко ял калык, район да республик гыч уна-влак погыненыт. Нуно тыгакак порын Василий Яковлевич Рожкиным шарналтышт.
Тиде мероприятий эртымеке, иктешлымаш лекте: марий калык шке патыр эргыжым да уста поэтшым порын шарнен ила.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.