2012 ий гыч Марий Эл Республикысе тÿвыра, печать да калык-влак паша шотышто министерстве ты темлыме пашам сайлан шотлышо министерстве, тӧнеж, организаций-влак дене пырля марла возышо сайт, портал, блог да интернет-тӱшка-влак коклаште конкурсым эртара. Министерствын печать да тӱшка коммуникаций виктемже увертарымыж почеш, конкурс Марий Элысе да шочмо калыкын тÿшкан илыме кундемласе марий-влак икте-весышт дене илышын тÿрлö йыжыҥжым интернет гоч келгынрак вашла палдарен кертышт да икте-весышт дене кутыраш сай йöн лийже манын кок ийлан ик гана эртаралтеш.
Теве кок тӱжем латнылымше ийыштат «Марнетын шÿдыржö-влак» конкурс эртаралтеш.
«Марнетын шÿдыржö-влак – 2014» марий йылме дене сайт-влак конкурсын жюри конкурсыш пурышо йодмаш-влакым ончаш тÿҥалын. Кызыт конкурсышко латкок участник деч йодмаш пурен. Тиде, Республикысе марий тÿвыра рÿдерын сайтше, «Чолман» ден «Марий Эл» газет редакций-влак, «Арслан» этнокультурный интернет-журнал, тыгак МарГУ-н студентше-влак марий-финн интернет-журналым аклаш темлат, тидын годымак Христина Александрова, Татьяна Япаева, Зоя Глушкова, Евгений Декин, Максим Алгайкин шке йодмашыштым пуэныт.
Теве «Марий калыкын тÿвыражлан, сымыктышыжлан, йылмыжлан, историйжылан, религийжылан да йÿлажлан пöлеклалтше эн сай сайт» номинацийыш «Кидшер» этнокультурный сайтше дене МарГУ-н студентше, марий блоггер Николай Любимов шке йодмашыжым пуэн. Каласен кодыман, Николай тыгак «Илыш ик гана веле пуалтеш» шке марий блогшым «Эн сай Интернет-дневник (блог), Интернет-сообщество» номинацийыште шке йодмашыже дене улеш. Николайын проектше-влак нерген «Марий Эл ТВ» каласкала.
Йодмаш-влакым эше 20 ноябрь марте вучат! Конкурсышто сеҥыше-влакын лÿмыштым тений декабрьыште увертарат.
Интернетыште эше могай сайт-влак улыт? Ончаш »
Электрон почтышкем тыгай серыш толын…
Пеш кугу тау! Шке чон гыч лекше мут-влакым вашлиймек ойлем! Вашке вашлийына! 🙂
Николай, конкурсышто сеҥыше-влак радамышке лекташ тыланем. Пеш кугу тау тыглай сай да поро пашам ыштен шогыметлан!
Пеш кугу тау!