«Ончылшовычым ӱшталына!» рубрикыштына таче кузе пареҥган пулашкамуным, полан гыч тамле шӱрым, шыл пучымышым да шыл дене тушитлыме пареҥгым ыштыме нерген мутнам луктына. Эн ондак пареҥган пулашкамуным ямдылена. 
Кӱлеш: 4-6 муно, 2 стакан ушкал шӧр, куд пареҥге, 1 кугу совла ушкал ӱй, шинчалым тамым ончен пыштыман.
Эрыктыме пареҥгым шинчалан вӱдыштӧ шолташ да, вӱдшым кышкалын, шураш кӱлеш. Тышке кӱчымӧ муным, свежа шӧрым, шинчалым ешарен пудыратыман да ӱйым йыгыме салмаш опталын, духовкышто але коҥгаште кӱкташ кӱлеш. Пулашкамуным шокшынек кочкаш сай. Чай олмеш шӧрым подылаш гын, эшеат тамлырак лиеш.
А ынде полан гыч тамле шӱрым ышташ темлена.
Кӱлеш: 300 г свежа але пел стакан коштымо поланлан 2 литр вӱд, 3 кугу совла дене мӱӥ да сакырложаш, 4 изи совла крахмал кӱлыт.
Свежа але коштымо поланым эрыктыман да тушко мӱй ден сакырложашым ешарен, 10-20 минут шулыктарен шинчыктыман. Чыла тидым туржын, шокте гоч колтыман. Полан шӱкым (шӱмым) луктын шуман, а кодшо сиропым изи тул ӱмбак шындыман. Шолаш пурымеке, вӱдеш лазыртыме крахмалым пыштыман да тул гыч кораҥдыман.
Тыгай шӱр шокшынекат, йӱкшымекат тамле. Южо вере поланым шокте гоч огыт колто, тыгак кочкыт.
А ынде шыл пучымышым ыштен ончлаш темлена ыле.
Кӱлеш: 400 г сӧсна але ушкал шыл, 100 г тар шӱраш, 200 г вӱд, ик вуй шоган, шинчал кӱлыт.
Шылым тыгыдын пӱчкеден, кӧршӧкыш пыштат. Тышкак сайын мушмо шӱрашым, шоганым, шинчалым ешарат, вӱдым пыштат да коҥгаште 20 минут наре шинчыктат. Тамле пучымыш ямде.
Пытартышлан шыл дене тушитлыме пареҥгын репцептшым возена!
Кӱлеш: 400 г сӧсна шыл, 10 пареҥге, 2 вуй шоган, ик кешыр, 3-4 пӱй чеснок, укроп кӱлыт.
Мушмо шылым тыгыдын пӱчкеден, кӧршӧкыш пыштыман. Ӱмбакыже — пареҥгым, вара кешырым, шоганым, чеснокым. Вӱдыш шинчалым пыштен пудыратыман да кӧршӧкыш опталман. Вӱд продуктым тичмашнек петырышаш. Кӧршӧкым пел шагатлан коҥгаш але духовкыш шындыман.
Пареҥгым тыгак салмашат тушитлаш лиеш. Кӧршӧк олмеш чыла продуктым салмашке оптыман да, петыртыш дене петырен, газ ӱмбак шолаш шындыман. Пеш тамле кочкыш ямде. Перкан лийже!

«Ончылшовычым ӱшталына!» рубрике… Ончаш »

«Ончылшовычым ӱшталына!» рубрикыш уверым ямдылаш
«Кугарня» газет гыч материалым кучылтмо.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.