Наташа Пушкина: «Чылажымат шке тептер дене ышташ перна»

Наташа ПушкинаМарий Эл радион вӱдышыжӧ, тудын лукшо (выпускающий) редакторжо Наташа Пушкинам кызыт республикыштына калык моткоч сайын пала. Пала тыгак мурышо, концертым вӱдышӧ, сценарийым возышо, спектакльым ямдылыше да тушто модшо семынат. Адакшым тудым илышыш уым пуртышо еҥ семынат палемдаш лиеш, вет лач Наташа икымше марий КВН-ым, икымше марий дискотекым эртарен, «Юмынӱдыр» икымше марий мюзикллан текстым возен. А лишыл жапыште, 21 ноябрьыште, тудын бенефисше лиеш. Тидын вашеш Наташа Пушкина дене вашлийын мутланышна.
– Бенефисым эртараш шонымаш кунам да кузе шочын? «Родо-влак, толза, вучаш тӱҥалам!» – ойлет радиошто йоҥгалтарыме увертарымаште. Каласышаш шомакет шуко погынен да эртарынет мо? Но вет тый погынышо мутетшым радиоэфир гоч каласен кертат. Тугеже ончыктышашет ятыр чумырген? 
– Бенефисым эртараш шонымаш мыйын огыл шочын. Тидым Ирина Якаева темлен, а мый кӧненам. Но молан тудо лачшымак «бенефис» манын увертарен – кызытат умылтарен ом керт. Мутланыме деч вара мый отпускыш каенам. Канен толмемлан радиошто увертарымашат кая: Пушкинан бенефисше лиеш.
А бенефисыште айдеме шкенжын усталыкшым, тачысе кече марте ыштыме пашажым, тиде жаплан могай кӱкшытышкӧ шумыжым ончыкта. Мыйынат тидыже такшым погынен ала-мо …
– Туге, вет тый ятыр мероприятийым икымше гана эртарыше улат. Но концертым, мыскара касым, моло пайрем ден мероприятийым эртарен, ноен отыл? Шерет теммыла огеш чуч?
– Тыгай шонымаш южгунам шочеш, вет Марий Эл радио концертым пашам ышташ тӱҥалме икымше ийынак, 2005 ий 24 декабрьыште, эртарен. Тидым ышташ тунам Андрей Чемышев темлен ыле. Кызытат тиде пашам шуена. Ынде тиде тыгак лийшашла чучеш. Шканнат келша. У форматым, у йӧн-влакым кычалаш тыршена. Но ноялтме южгунам шижалтеш. Поснак, кунам теҥгече гына иктаж-кушеч толынат, а таче адакат эртарыман. Але, мутлан, черле улат, но садак тиде пашам ыштыман. Ямдым конден огыт пу. Чылажымат шке уш-акыл, шке вий, шке моштымаш да тептер дене ышташ перна. Сандене яра шинчаш огеш лий. Тарванылман, куржталыштман.
– Но вет еш илышланат утларак жапым пӧлеклымет шуэш дыр?
– Шуэш. Но пелашем Андрей Чемышев тугак Сыктывкарыште пашам ышта. Тудо мӧҥгышкӧ кок арнялан ик гана веле толын кая.
– Санденак тудын вес олаште пашам ыштымыж дене тыйын тӱрлӧ мероприятийым, концертым эртараш, шканет утларак жапым пӧлеклаш йӧнет утларак уло.
– Тидыже тыгак. Андрейын мӧҥгышкӧ толмыж годым шуко вереже ом кай. Кайымем огеш шу. Ончылгоч эртараш палемдыме гын, тыгайыш каем, а вес кечыш кусараш лиеш гын, мӧҥгыштӧ утларак жап лияш тыршем. Тудо мыйым огеш йолышто гынат, шкендым шке йолыштет. Но садак мариян вате лияш сайрак. Мариян вате лийман.
Андрейын вес олаште улмыж годым чыла тӱткышем пырысемлан ойырем. Тиде изи чонат эре мӧҥгышкӧ шупшеш. Тыгодымак тудо лыпландара, куандара.
– Тый эше сӱаным эртарет. А туштыжо тӱрлӧ палым, йӱлам шотыш налаш темлет. Мутлан, ушнышо-влак деч тортым налын кочкаш. Тидым ыштыме дене теат пиалан лийыда, могай шонымашым ойлен кочкыда, тудо шукталтеш, але марлан кайыдыме марлан кая, манат. Але, мутлан, сорта дене шке шотан йӱлам эртарыктет. Шкеже нунылан ӱшанет?
– Мый сай энергетикылан ӱшанем. Эртарыме сӱанлаште шкежат ик гана веле огыл оксам тӱлен тортым налынам. Молан? Самырык мужыр гаяк пиал шижмаш дене авалталташ манын, вет тортым пиалан кид пуа. А пиалан еҥ пуа гын, шонымашет садак шукталтеш. Мый тидлан ӱшанем.
– Сӱаным эртараш тый ешартыш оксам ыштен налаш шонен тӱҥалынат мо?
Наташа Пушкина– Тидым мый шке огыл, а радиошто пашам ышташ тӱҥалмеке, еҥ-влак икте, вара весе, кумшо сӱаныштым, пайремыштым эртараш темлаш, йодаш тӱҥалыныт. Нигушто нимогай рекламым пуэн омыл гынат, йодшо-влак эре улыт. Тыгодым иктым палемден кодынем: сӱаным эртарымеке, мый пален налаш тыршем: тиде мужыр кузерак ила, пиалан мо, икшывыже шочын, уке? Икманаш, пиаланак лийышт ыле манын тургыжланем. Мынярыштым палем гын, нуно сайын, келшен илат.
– Мом эше уым тый дечет вучыман?
– Кызыт канем. Илышем икшырымын кая. Ик велым, сай, но, вес велым, йокрок. Йокрокшо творчестве шотышто. А такшым чот йокрокланаш да канаш жап утыжым уке. Кызыт мый Марий кугыжаныш университетыште магистратурышто тунемам. Финн-угор филологий дене магистр пашам возем. Ӱмаште пуренам, вес ийын пытарышаш улам. Темемже тыгай: «20-60-шо ийласе марий драматургийыште этнопоэтике». Мылам шканемат марий драматургийым лудаш, шымлаш келша, сандене тыгай темым ойырен налынам. А ӱмаште Палантай лӱмеш тӱвыра да сымыктыш колледжын эстраде вокал отделенийжым тунем пытаренам.
– Тугеже тый ынде профессионал мурызо улат?
– Такше тыге лектеш, но шкемым мурызылан ом шотло. Театрализоватлыме спектакльым ямдылаш тӱҥалмеке, сценарийлан келшышын тушко мурым пурташ кӱлеш да веле мураш лектынам. Кеч шкеже мурызо семын сценыш лекташ нигунамат шонен омыл. А мураш тӱҥалмекем умыленам: муренже ом мошто. Садланак тунемаш пуренам. Тунемаш тӱҥалмеке весым умыленам: мый мурен йӧршын ом мошто улмаш! Тунем пытарымеке гын тиде шонымашем утыр веле пеҥгыдемдалтын. Чын мураш, йӱкым чын лукташ тынар шуко тунемман! Кеч музыкышто палыше-влак пытартыш жапыште палемдат: «Мурымо шотышто тый кушкынат, вашталтыш шижалтеш».
– Бенефисыштет у мурым мурет?
– Мурым ямдылем, но тудо у огыл – тиде «Маныт мыйым чыланат курчак» муро. Тудым мураш мылам шукертсек темлат. «Наташа, тиде – тыйын мурет»,– маныт. Мом шылташ, мыйын капем изиак. Тидым концертлаште мыскара йӧре достоинство семын ончыкташ тӱҥалынам. Кеч шкемынже тидын шотышто кызытат «комплекс неполноценности» манме уло.
– Юмо арам огыл кажне айдемылан ала-мом пуа, а ала-мом огеш пу. Тылатат, очыни, лӱмынак изирак капым пуэн. Чылашт гай лият гын, ала тынар пашам от ыште, ойыртемалташ от тырше да ласкан гына илет ыле. А тыге тый, тевыс, мыняр пашаште икымше улат. Тугеже ала тауштыман гына?
– Ала тыге.
– Тыйын эн кугу шонымашет могай?
– Уло кӧргысӧ шонымаш. Но вес шонымашыже – кӱлешан еҥ лияш. Шке личный манме шонымашемжат шукталтше манын моткочак вучем.
– Чот вучет да тидлан ӱшанет гын, шонымаш садак шукталтеш, маныт палыше-влак. Тыйынат тидлан эше лач жап шуын огыл, очыни.
– Мыят шкемым лач тыгак ӱшандарем.
– Ӱшанет, тугеже тыгак лиеш. Тыгак лийже да шонымашет шукталтше.

Автор: Любовь Камалетдинова,
Налме вер: gazetamariel.ru

Кидшер
Шонымашым ешараш