28 ноябрьыште Сеҥымашын XXX идалыкше лÿмеш тÿвыра полатыште Российысе калык усталыкын сулло коллективше, О. Ипай лÿмеш Кугыжаныш самырык-влаклан премийын лауреатше, «Марий памаш» фольклор-этнографий ансамбльын лÿмгече концертше эртыш.
Ансамбльым 1974 ийыште марий калыкын оҥай мурымо-куштымо йÿлажым арален кодаш, вияҥден колташ, самырык тукымым калык йÿла деке шÿмаҥдаш манын чумырымо. Тудо мурышо да куштышо группыла, вокалист да марий калыкын семÿзгарже дене шоктышо-влак гыч шога. 
«Марий памаш» ансамбль — республикын визитный картычкыже. Коллектив Марий Элыште веле огыл, öрдыж кундемлаштат палыме. Ансамбль лауреат лÿмым да тÿрлö чапым Российысе веле огыл, тыгак Венгрийысе, Финляндийысе, Эстонийысе, Испанийысе конкурслаште налын.
Эртыше касыште «Марий памаш» нерген шуко поро мут йоҥген. Касым марий эстрадын шÿдыржö-влак: Эльвира Трифонова, Вадим Краснов, Аделина Батаева сöрастареныт. А концерт-программым Раисия Данилова вÿден.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.