Спелл-чекер, марий сайт йылмым вияҥдаш полшат

Марий йылмын вияҥмыже, илыш дене тӧр кайымыже Интнернет кумдык гочат палдырна.  Теве Коми Республикыште илыше да пашам ыштыше А.Чемышев тидын шотышто шуко тырша. Кодшо ий мучаште тудо шочмо калыкшылан сай пӧлекым ыштыш: чын возымым тергыше системым (спелл-чекерым) келыштарыш. Тиде компьютер программе текстым тергаш полша да чынвозыш (орфографий), йылмылончыш (морфологий), пунктуаций шотышто йоҥылыш-влакым ончыкта. Тидын годым системе икмыняр вариантым темлен кертеш. Андрей Валерьевичын палемдымыж почеш, чын возымым тергыше системе посна программе семын але иктаж компьютер программын (электрон мутерын, текст редакторын, кычалше системын, браузерын да т.м.) ужашыже лийын кертеш. Спелл-чекерым Aspell, Hunspell, HFST системе-влак негызеш ышташ лиеш. Нуно эрыкан лицензий почеш шаркалалтыт.  

Марий спелл-чекер окса тӱлыде шаркалыме LibreOffice офис пакетлан, Mozilla Firefox браузер да Thunderbird почто клиентлан келыштаралтын, тыгак тудым webspell.fu-lab.ru сайтыште кучылташ лиеш. LibreOffice офис пакетлан модульын (файлын) лӱмжӧ — mari_spell.oxt. Тудым code.google.com сайт гыч налын, кеч-кӧат шке компьютерышкыже шынден кертеш.

Тачысе кечын марий сайт шагал огыл. Марий газет ден журнал, мер организаций-влак сайтыштым тӱрыс марла вӱдат гын, южо министерстве, ведомство да учреждений сайтын марла вариантшымат темла. Тыгак марий мурызо А. Куклин, В. Матвеев, сӱретче И.Ямберде, поэт З.Дудина, мыскараче Эсметр Сергуш шке сайтыштым ыштеныт. Икмыняр блоггер марла воза. А тений 1 январь гыч Советский районысо Ӱшнӱр школышто латикымше классыште тунемше Николай Любимов эше ик марий сайтым почын. Тудо «Кидшер» маналтеш. Тачысе кечын Николай — марий сайтым шочыктышо-влак кокла гыч эн самырык. Шкенжым журналист корнышто такырташ тырша. Марий калыкын илыш корныжо, тӱвыраже, йӱлаже нерген кумданрак да келгынрак палдараш шонымыжо тӱвыргӧ лийже манын тыланена.

Марий йылме Интернетыште пеҥгыде верже лийже, йоҥгалтше манын, эшеат шуко сайт лийшаш. А тудо у орфографий дене келшышын возалтше манын, спелл-чекерлан эҥерташ темлена.

Светлана Пехметова

Кидшер
Шонымашым ешараш