«Кидшер» сайтын коллективше кузе ила?

Марий Элыште улшо тӱрлӧ газет, журнал, радио да телевидений редакций-влак кыртмен пашам ыштат манам гын, йоҥылыш ом лий, очыни.  Илыш ончыко кая, интернетыштат тӱрлӧ интернет-журнал, сайт-влак марий уверым лудаш темлат. А ме марий-влак, интернетыште кызыт шуко мом ыштен кертына: марий мурым, фильмым марла уверым шке да вес калыкланнат ончыктен, лудаш темлен кертына.
Марий йылмым, тӱвырам, йӱлам арален, вияҥден кодымаште «Кидшер» этнокультур сайтын изирак да надырже уло, шонем. А кузе «Кидшер» этнокультур сайтын коллективше пашам ышта?  Тиде йодышлан вашмутым тиде возышышто лудын кертыда.
«Кидшер» этнокультур сайтым шочыктымаште кугу надырым марий лингвист, компьютер йылмызе Андрей Валерьевич Чемышев пыштен. Тачысе кечылан Андрей поро йолташна улеш. Тудо кеч могай йӧсылыкышто мыланна полша, ой-каҥашым пуа. Тидланже тудлан пеш кугу таум гына ойлен кодыман.
А сайтым виктарымаште пашам тӱҥ редактор ышта. Тӱҥ редакторын сомылжым «Кидшер» этнокультур сайтыште Николай Любимов шукта. Тиде сомыл кугу моштымашым йодеш, вет тыште возымо верым моторын, калыклан умылаш лийже манын сайтыште ончыктыман. Тугеже, редакторын сомылышкыжо, корректор, дизайнер, журналист а кунамже программистынат пашажым пален шогыман. Туге гынат, редактор сайтын марий ден руш версийлаштыже шкетын пашам ыштен огеш шукто. Санденак руш версийыште вес, руш редактор Владимир Виногоров тырша. Тудо руш лудшо-влаклан чолга, самырык еҥ-влак, тыглай увер-влакым лудаш темла. Каласен кодыман, марий версийышкат шукерте огыл Марина Чермакова (Яндыбай) ушнен. Марина сайтыштына сылнымут рубрикым вӱда.
Коллективна кугужак огыл, но туге гынат пашам кыртмен, иквереш, икоян ыштена. Полыш кӱлеш гын, ала-кузе вучыдымын полыш тӱрлӧ вер гыч толеш. Шке спонсорна-влакым палемдыде огына керт. «Марий Эл» Марий Элысе мер-политик газетын тӱҥ редакторжо Александр Абдуловлан, йоча-влаклан пӧлеклалтше «Ямде лий» газетын тӱҥ редакторжо Лидия Семёновалан да тыгак посна кугу тау самырык-влаклан «ВийАр» тӱвыра кыл ушемын председательже Алёна Ивановалан ойлен кодынена ыле.

Кидшер
Шонымашым ешараш

  1. Роман Золотарёв

    Пеш молодец улыда! Тау пашаладна!

    Ответить
    1. viktaryshe автор

      Пеш кугу тау! 🙂

      Ответить