У ий да Рошто пайрем дене Марий Эл Республикын Правительстве вуйлатышын алмаштышыже, тÿвыра, печать да калык-влакын пашашт шотышто министр Михаил Васютин саламла.
Пагалыме да шергакан йолташ-влак!
Шушаш У, 2015 ий, да Рошто пайрем дене шокшын саламлем. Пиалым, куаным, сай илышым, йöратымашым да келшымашым тыланем!
Эртыше 2014 ий Марий Эл Республикын да уло элнан историйыштышт Тÿвыра идалык семын кодеш. Тудым иктешлышыла, кугешнен палемден кертына: республикына куштылго огыл, но волгыдо да мондаш лийдыме ийым сайынрак вашлийын да шот дене эртарен!
Марий Элын тÿвырам аралыме да профессионал сымыктышым вияҥдыме шотышто сай кÿкшытыш шумыж нерген тÿнямбалсе тÿвыра форумлаште кÿкшö трибуныла гыч шуко гана ойленыт. Таче мемнан инноваций проект-влакна нерген Российын кажне луклаштыже да йот эллаштат палат.
Тиде ийын кыртмен пашам ыштыше-влаклан алал кумылын тауштем. Лач пырля тыршен ме тÿвыранам арален кодымо да вияҥден колтымо шотышто у шонымашна-влакым илышыш шыҥдарен кертынна. Тÿвыра идалык дене пайдаланен, образований, театр, тоштер, библиотеке да фестиваль-влак дене кылдалтше проектна-влакым у кÿкшытыш луктынна.
Ӱшанем: У ийыштат, тудым Литератур идалык манын увертарыме, эртыше ийыште ыштымын эн сайжым уэш илышыш шыҥдараш усталык вий-куатна сита.
Тек нелылык ден чарак-влак, кудышт дене ончыкыжым тÿкнен кертына, кумылым огыт волто, сайлан ÿшаным огыт пытаре! Нимо удам шотыш налде, чоныштыда, шке ешыштыда, лишыл еҥда-влакын ешыштышт ласкалык озаланыже.
Пеҥгыде тазалыкым, неле тат годым лишыл еҥ-влакдан эҥертышыштым, нєлтшє кумылым да творчествыштыда пиалым тыланем!
У ий дене! Весела Рошто пайрем дене!

Михаил Васютин,
Марий Эл Республикын Правительстве вуйлатышын алмаштышыже,
тÿвыра, печать да калык-влакын пашашт шотышто министр.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.