«Кидшер» нерген могай шонымаш?

15 декабрьыште 2013 ийыште «Кидшер» интернет-журналлан негызым пыштыме ыле, лач ты кече деч вара сайтна вияҥаш да шкаланже поро йолташ-влакым кычалаш тӱҥалын.
Сайтын коллективше шуко ма, шагал ма, ынде ик ий утла тендан дене пырля улеш. Тиде изирак пайрем лӱмеш ««Кидшер» интернет-журнал дене пырля» изирак конкурсым эртаренна ыле!
Таче конкурсын иктешлымашыжым ыштен улына.  Шуко паша пурен, санденак, паша-влакым аклашлан шуко жап кӱлын, но туге гынат ик ойышко лекна. Тыгеракын, конкурышто сеҥышым лӱмжӧ дене палдарена да,  сеҥымаш дене саламлена!
Икымше верыш «Ямде лий» газетын тӱҥ редакторжо  Семёнова Лидия Васильевна «Тиде чыла сай шонымаш дене тыланымаш!» шонкалымаш статья дене сеҥыше радамышке лекте. Тудын пашажым лудаш темлена:

Мый ийгот шот дене самырыкак омыл, йӱдшӧ-кечыже интернет «эҥэҥыремышвотышто» шинчыше еҥланат шкемым ом шотло, но тыгодымак моло деч почеш кодмо ок шу. Социал сетьлашке пурыде ом код, адакше паша должностят тидым ышташ йодеш.
Интернетым ме ынде СМИ семынак аклена. Тудын (ты шотышто «Кидшер» интернет-журналжынат) тӱҥ сомылжо – увер дене палдараш. Ме, кагазеш савыкталтше СМИ-влак, уверым лудшына деке икмыняр кече гыч гына намиен шуктена гын, блогер-влак ужмо-колмышт дене тунамак палдарат.
Тиде ончылмут олмеш лие, а ынде лач «Кидшер» интернет-журнал нерген шонымашем каласем:
Тудын авторжо, Н. Любимов, — «Ямде лийын» юнкоржо. Шке сайтшым эше школышто тунеммыж годымак ыштен да ты пашашке ушнен. Тачысе кечын Николайым республикыштына эн самырык блогерлан шотлыман. Тиде сай! А сай паша эре примереш шындалтеш, тугеже рвезе почеш моло тунемшат ты пашашке шупшылалт кертеш.
Пример, манына. А вет «Кидшерланат» пеш сай пример уло – Эльвира Куклинан «Арслан» интернет-журналже. Тудо икмыняр жапыште кугу кӱкшытыш шуын. Сандене «Арслан» «Кидшерлан» полышкалышат, тыгодымак тудын дене таҥасышат лийшаш. Марий илыш — тӱвыра, эртыше илыш, йылме, йӱла да т.м., интернет гоч мыняр шукырак ончыкталтеш, тунар шукырак марий калык нерген пален налыт.
Газетласе статьян авторжо-влакым ме, журналист-влак, шукыштым возымо стиль гыч палена. Мутлан, икмыняр ий ончычрак «Кугарня» газетын «йылмыже» йӧршын ойыртемалтше ыле. Мыйын шонымаште, интернет-журнал-влакат ик семын возышаш огытыл, кажныже марий йылмын мут поянлыкше гыч ойыртемалтше мутвундым кучылтшаш. «Кидшерым» шергалше-влак утларакше самырык улыт, самырык семын нуно мут поянлыкымат уэмден-пойдарен толшаш улыт.
«Кидшер» самырыкын кидыште. Самырык годым йоҥылышымат ыштен колташ лиеш. Сандене авторжылан эн ончыч мый тыланем законым пален шогаш, моло блогер деч ой-каҥашҥашым йодаш ӧрман огыл. Марий йылме дене интернет-журналым лукташ шке вачӱмбакет налынат гын, марий йылмым сайын палышаш улат.

Пагален, «Ямде лий» газетын
тӱҥ редакторжо Лидия Васильевна Семёнова.

Уло кумылын Лидия Васильевна сеҥымаш дене саламлена! Пӧлекым мемнан деч налын кертыда. А кӧ сеҥыше радамышке логалын огыл гын, ида ӧпкелалт, кажныже «Кидшер» интернет-журнал дене тыгакат келшен кертеш.

Пагален, «Кидшер» этнокультур сайтын 
тӱҥ редакторжо Николай Любимов.

Кидшер
Шонымашым ешараш