Сылнымут корным ойырен налше самырык автор-влаклан ўшанлын йол ÿмбак шогалаш полшаш манын, В.Абукаев-Эмгак лÿмеш «Ший памаш» сылнымут фонд ÿмаште ышталтын. Тидлан оксам Североморскышто илыше да пашам ыштыше кокымшо ранган капитан, прозаик да драматург В.Краснов ойыра. Конкурсышто 30 ияш марте тÿҥалше автор-влак тиде ийын газет ден журналлаште савыкталтше сылнымут саскаштым пуэн кертыт. Жюри 2014 ийысе конкурсыш пурышо паша-влакым ончен лектын да аклен. 
– В.Абукав-Эмгак лÿмеш фонд самырык-влакым сылнымутлан кумылаҥдаш полшаш шонымаш дене ышталтын, – палемдыш Василий Владимирович. – Тений сылнымут конкурс кокымшо гана эртаралтеш. Тиде гана ÿмашсе деч шукырак паша пуреныт, эн сайжым ойырен налаш нелырак ыле. Туге гынат сеҥыше-влакын лÿмышт пале.
Эн сай журналист паша номинацийыште «Ший памаш» фондын дипломжо да «Виш чон» премий дене «Кугарня» газетыште тыршыше Ирина Кудряшова ден Анастасия Эманова палемдалтыныт. Поэзий номинацийыште сеҥышыш самырык поэт-влак Марина Чермакова ден Игорь Попов лектыныт. Нунат диплом да «Кинде-шинчал» премий дене палемдалтыныт. А эн сай драматургий номинацийыште «Кайыккомбо кашта» премий Владимир Матвеевлан логалын.
Нунылан диплом ден окса премийым 28 декабырьыште М.Шкетан лÿмеш кугыжаныш национальный драме театрыште В.Краснов кучыктен. Чаманаш веле кодеш, нылымше – эн сай прозо – номинацийыште «Ошкеча» премий дене тений иктат палемдалтын огыл.
Василий Владимирович шушаш ийын ты конкурсыш ик номинацийым ешарыме нерген ушештарыш. 2015 ийыште эн сай самырык радио- да тележурналистым палемдаш тÿҥалыт. Тыгак шушаш ийын «Ямде лий» газет дене пырля школышто тунемше йоча-влаклан тыгаяк конкурсым эртараш тÿҥалме нерген ойлыш. 2015 ий январь-февральыште школышто, лицей ден гимназийлаште шинчымашым погышо ÿдыр-рвезе-влаклан сылнымут конкурсым увертараш шонымаш уло.

Василий Краснов: «Тек ончыкыжым нуно илышыштым литератур дене огыт кылде гынат, шочмо марий йылмылан кумылаҥдаш, тудын мутвундо поянлыкшым шымлаш да, мутат уке, сылнымут аланыш икымше ошкылым ышташат полшаш шонымаш дене тудо ышталтеш. Тÿҥжö – икшыве-влак шонкалаш тунемышт.»

Автор: Евгений Садовин. «Марий Эл» газет гыч налме.
Видеосӱретым «Регион 12» телеканалын архивше гыч налме.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.