Йошкар-Олаште Келшымаш пӧртым идалык мучаш марте чоҥен шуктат

Йошкар-Олаште Калык-влакын келшымаш пӧртышт умбакыже чулымын чоҥалтеш.

Йошкар-Олаште Калык-влакын келшымаш пӧртышт умбакыже чулымын чоҥалтеш. Кызыт тушто 50 еҥ тырша. Зданийын ончыл велжым кӱ дене комыжлымо пашан пелыжым ыштен шуктымо, вентиляций системым вераҥдыме, кӱварым шарыме, отделкым ыштыме, электротехнический ден сантехнический паша шукталтеш. Келшымаш пӧртым ыштымашке Марий Элым вуйлатыше Александр Евстифеев миен коштын.

Тудо подрядный организацийым – «Специализированный застройщик «Казанский Посад» ООО – вуйлатыше Руслан Муталиев дене пырля чоҥымо паша графикым да финансым ойырымо йодыш-влакым каҥашен.

Тыге палемдыме: контракт почеш Калык-влакын келшымаш пєртышт 2023 ий майыште пашаш колталтшаш, но подрядчик тудым ончылгоч, тений декабрьыште, сдатлаш ямдылалтеш. Чыла паша графикым ончылтен шукталтеш.

«Россий Федерацийын культур министрже Ольга Любимова дене вашлиймаште 2023 ийыште ойыралтшаш оксам 2022 ийыш кусарен кертме нерген кутырен келшыме, тидлан кӧра Калык-влакын келшымаш пӧртым тений чоҥен шукташ шонена»,– каласен республикын культур министрже Константин Иванов.

Марий Элым вуйлатыше Александр Евстифеев тылеч ондак Россий Минстройым вуйлатыше Ирек Файзуллин дене тудын республикыш толын коштмыж годым тыгаяк кутырен келшымашке шумо манын ушештарен.

Калык-влакын келшымаш пӧртыштын тӱҥ ойыртемжылан шуко тӱрлӧ пашам шукташ келыштаралтмыже шотлалтеш. Тӱрлӧ калык-влакын представительыштлан пашам ышташ кӱлшӧ офис шотан пєлем, концертым ончыктымо, куштымо да репетицийым эртарыме зал-влак деч посна тушто кеч-могай кӱкшытан вашлиймашым онлайн йӧн дене эртараш йӧным пуышо йӧҥгыдо да технике дене сайын пойдарыме конференц-зал лийшаш, палемден республикым вуйлатыше.

Тачысе кечылан чыла кум пачашыште чоҥымо чумыр пашам тӱрыснек шуктымо, тӱжвал да кӧргысє пырдыж-влакымат оптен пытарыме, окна блок-влакым вераҥдыме, леведыш ямде, моло пашамат шуктымо, зданийыш шокшым пуымо. Тўрыс налмаште объектыште 47 процент пашам шуктымо, а вет тушто пашам талук наре ончыч веле тӱҥалме.

 

Марий Эл Республикым вуйлатышын организаций да аналитике виктемжын уверже негызеш Павел Шакиров ямдылен

Йолташ-влаклан палдараш
Кидшер
Шонымашым ешараш