Татьяна Денисова Морко районысо Масканур ялыште шочын-кушкын. Весшÿргӧ ялысе кыдалаш школым тунем пытарен. Ачаже гармоньым шоктен моштышо, аваже мураш йӧратыше лийыныт. Таня изинекак мурашат, гармоньым шокташат тунем шуктен. Школысо самодеятельностьыш коштын, шуко гана пайрем концертлаште мурен. Школ деч вара Морко посёлкысо 24-ше номеран СПТУ-ш штукатур-малярлан тунемаш пура. Туштат художественный самодеятельностьын активный участникше лиеш. Училищыште «Рвезылык» ансамбль улмаш. 
Татьяна ансамбльыште эн тале солистка семын ойыртемалтын. Яндар йÿкшӧ ден чыла ончышо-влакым куандарен.
1985 ийыште Таня Йошкар-Олашке илаш толеш. Тыште «Марий памаш» ансамбльыш ÿдыр-рвезе-влакым погат манмым колын, тергымашыш мия. Ансамбльым вуйлатыше В.П. Данилов, сай йÿк дене сылнын мурымыжым колын, Татьянам тунамак коллективыш налеш. Ансамбльыште Татьяна солистка семынат, тÿшкан мурымаштат участвоватла.
«Марий памаш» дене пырля республика мучко да республика деч ӧрдыжкат коштеш. Чыла вере тудым яндар йÿкан мурызо семын палаш тÿҥалыт. Санденак «Яндар-яндар» калык мурым мурымыжым Марий радио дене йоҥгалтареныт. Тиде муро дене Татьяна Денисова уло республикылан у мурызо семын палыме лиеш. Тиддеч вара композитор Вениамин Захаровын «Вучыдымо вашлиймаш», «Изи кайык», «Ош йолгорно» мурыжо-влакым йоҥгалтара.
Тыге тудо 1993 ий гыч, «Марий памаш» деч ойырлен, моло композитор-влакын мурыштымат Йошкар-Олаште эртарыме пайрем концертлаште мурен коштеш. Репертуарже кугеммеке, пÿтынь концертым усталык касыште шкетынак ышта. Илен толын Марий филармонийын артисткыже лиеш. 1990 ийыште Смоленскыште эртыше «Голоса России» Всероссийский конкурс гыч дипломант лийын пӧртылеш. 1994 ийыште Словакийын Нитра оласе Тÿнямбал молодежь фестивальыште посна приз дене палемдалтеш. Фестивальыште Татьяна «Яндар-яндар» мурым йоҥгалтара. 2006 ийыште Татьяна Денисова Озаҥ оласе тӱвыра да сымыктыш университетым тунем пытарен. Шуко-шуко мурыжо марий эстрадыште хит улыт. Кызыт ме тыланда «Каенат» мурым колышташ да Татьяна дене пырля муралташ темлена.
«Каенат»
мутшо Татьяна Пчёлкинан.
Каенат, каенат, каенат — тылзе ужаталже!
Каенат, каенат, каенат — тылзе ужаталже!Пиалан лийнем мый тиде ош тӱняште. Умылет, уке?
Ышна пале ойгым, йӧратым таҥем, шинчана йӱлен.
Шӱлыкнажым почна курым курымешлан, йомакет келшен.
Кеҥеж йӱр гай веле ныжыл кумылетше, мланде йыр каем.
Кече огеш шыргыж, йӱр гына мура.
Кайышылан – корно, кодшылан — пиал.
Мардеж ден колтем шӱлыкем. Ойгем наҥгая.ПРИПЕВ: Каенат, каенат, каенат — тылзе ужаталже.
Каенат, каенат, каенат — мӱйын кочо там.
Каласал, каласал, каласал, кушто чын куанже?
Каласал, каласал, каласал — мые кораҥам.
Каенат, каенат, каенат! Кайышылан – корно!
Каенат, каенат, каенат! Кайышылан – корно!Палышым пиалым воктенет шижде гыч, тау тыланетше.
Чон коржеш гын нелын, йӧсым ида кучо, илыза пеледын.
Еҥын пиал омым мые ом тӱкале шолып нигунам.
Пӧртылат гын угыч шошо мардеж семын, кӧ почеш омсам?
Кече огеш шыргыж, йӱр гына мура.
Кайышылан – корно, кодшылан — пиал.
Мардеж ден колтем шӱлыкем. Ойгем наҥгая.
Пеш сылне муро!
Мыланнат тиде муро пеш келша. Шке шонымашым каласен кодымыланда пеш кугу тау!