Моло ӱдырамаш поэт семынак тудо илышыште кок фамилий дене коштеш: почеламутшо йымалан «Татьяна Пчёлкина» манын воза, журналист материал йымалне – «Иванова». Кок фамилийже денат калыклан сайын палыме. Таклан огыл кодшо кугарнян эртыше «Муралтынем эн ныжыл мурым» усталык касышкыже Йошкар-Оласе ик эн кугу залыш, Сеҥымашын ХХХ идалыкше лӱмеш тӱвыра полатышке, калыкым тич поген ыле. Тудым пайрем оза шканже 45, сылнымут аланыште тыршымыжлан 30 ий теммылан да Шнуй Татьянан кечыжлан пӧлеклен.  Адакше тенийлан увертарыме Сылнымут идалыкыште тиде икымше поэзий да муро кас ыле. Татьяна Пчёлкина – Самырык-влаклан Олык Ипай лӱмеш кугыжаныш премийын лауреатше, Россий Писатель ушем член. Морко район Кабаксола ялыште мӱкш гай тыршыше ешеш шочын-кушшо Татьянам воктенже улшо да палымыже-влак эн ончычак ныжылге да поро, мыскара кумылан улмыжлан пагалат да йӧратат. Тыгаяк шӱлышан почеламут корныла лектыт тудын чонжо гыч. Мӱкшат вет пеледыш гыч пеледышыш чоҥештылын, эн сай нектаржым веле налеш да омарташке конда. Татьяна Пчёлкинан возымо мутышкыжат вигак сем возеш, палемдат тудын почеламутшылан мурым возышо-влак. 5 почеламут сборник да 50 наре муро лач тидымак пеҥгыдемдат. Морко мланде мылам – суксо кумыл. Йылгыжалын йӱла кас кава. Тушто чон каналта, тушто умыр, Тушто лийын вучалше ава. Шочмо верже, ача-аваже тиде айдемылан моткоч шерге улыт. Садлан тидыжланат, тудыжланат шуко сылнымут корным пӧлеклен. Зоя Васильевна ден Александр Павлович пашаште тыршыше, тыгодымак муро ден семлан шӱман лийыныт. Иктыжын гармонь я баян почеш шокталтен колтымыж почеш весыже лыжган муралтен. Тиде варажым йоча-влак декат куснен. Татьянан пелен сценыш кажне гана Сергей шольыжо лектеш. Баянист-виртуоз, маныт тудым палымыже-влак. Тидын дене келшыде ок лий. Мый шкежат Сергейын полышыжлан ик гана эҥертышым. Газетын пайремжылан пӧлеклыме концертыште марий шӱшпык Майя Романова мурышаш ыле. Но кенета тылеч ончыч тудлан шоктышо баянист сценыш лекташ тореш лие. «Мый весе дене ом муро», — манеш М.Романова. Мый тудым телефон дене кутырен келшыме Сергей Пчёлкин дене мурен ончаш кутырен савырышым. «Ну йӧра, тӧчен ончена», — мане тудо. Мый Сергейым мӧҥгыж гыч Майя Тимофеевнан пачерышкыже кондышым. Тудын «Асан ден Кансыл» спектакль гыч Кансылын мурыжым мурымыж почеш Сергей семыш тыманмеш пурыш да шокташат тӱҥале. «Мылам баянистет келшыш, мый тудын дене мураш келшем»,- Майя Тимофеевнан тиде шомакше Сергейлан пеш кугу ак ыле, шонем. Сергей акажын усталык касыштыжат шке мастарлыкшым ончыктыш. Тудын шоктымо семже почеш Татьяна «Шокталте, шольым, шокталте» почеламутым сылнын лудо. Мурызо-влакым сценыш саламлаш кӱзышӧ-влак алмаштеныт. А нуныжо пытыдыме шукын лийыныт. Марий Мер Каҥаш вуйлатыше да Марий Эл Кугыжаныш Погын вуйлатышын алмаштышыже А.Иванов Татьяна ден Сергей Пчёлкинмытлан, сылнымут да семтӱня аланыште ыштыме пашаштым кӱкшын аклен, Таумутым кучыктыш. Кугу пӧлекым ыштышт землякыштлан морко-влак. Икымше номеран школышто марий йылмым да литературым туныктышо С.Никитинан тунемшыже-влак Диана Егорова ден Ярослав Яковлев Татьяна Пчёлкинан почеламутшо-влак негызеш ямдылыме сылне композицийым ончыктышт. А теве Илья Александровын почеламутым лудмекыже, сценыш чынжымак Морко сӱан лекте. Пайремым усталык касын озаже Татьяна Пчёлкинан мутшылан возымо «Марий калык ила» чап муро мучашлыш. Тудым Марий Элын калык артистше Олег Логинов йоҥгалтарыш. Тыге поэт сылнымут корныштыжо ыштыме ик пагытым иктешлен, весыш кусныш. Ийготым погымо дене илыш умылымашат келгемеш. Тидыже, мутат уке, поэзийыштат шкеж нерген палдара. Татьяналан ончыкыжат тӱвыргӧ лектышым тыланена.


Налме вер: «Марий Эл» газет
Автор: Светлана Белкова, Михаил Скоболевын фотожо.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.