Мо дене тиде кече шарнымашеш кодын? Могай лӱмлӧ еҥ шочмо кечыжым палемда? Тидын нерген «Кидшер» интернет-журналын материалыштыже.
Пайрем да памятный дате-влак
- Азербайджан — Кӱртньыгорно пашаҥ-влакын кечышт.
Событий
- 1792 ий — США-н президентшын резиденцийжым чоҥаш тӱҥалме. Тудо кызытат шке статусшым йомдарен огыл.
- 1883 ий — Российысе театрал-влакын мер ушемыштым почмо.
- 2006 ий — ООН-ын серетарьжылан Пан Ги Мун шогалын.
Шочыныт
- 1946 ий — Юрий Никитьевич Алексеев, Марий Эл Республикысе ял озанлыкын сулло пашаеҥже. Тудо Морко кундем Кужнур ялыште шочын. Ончычсо паша корныжо шочмо кундемысе «Родина» колхоз дене кылдалтын: тыште тудо вуйлатышыланат тыршен. 7 ий Морко кундемысе администраций вуйлатыше лийын. 2001-ше ий гыч — Марий Эл ял озанлык министрын алмыштышыже. Кугыжаныш погынын депутатше сомылымат ятыр ий шуктен.
- 1948 ий — Нина Петровна Селюнина-Рочева, спортсменка, кӱшыл классан тале ечызе, тӱнямбалсе чемпионка, Олимпийсе модмашын ший призёржо, Марий Эл Республик тӱвыран, Россий Федераций капкультур пашан сулло пашаеҥже. Шкеже Киров вел Вӱрзым кундем гыч. Шинчымашым Шернур школ-интернатыште, медучилищыште поген. 1976-шо ийыште Сыктывкарыш илаш куснен. Марий калык тале спортсменкам кызытат шарна: мутлан, Шернур кундемыште Нина Петровна лӱмеш ӱчашымаш-влакым эртарат.
- 1961 ий — Александр Алексеевич Александров, Морко кундемысе Киров лÿмеш ял озанлык артель вуйлатыше.
Калык пале
Михаилын кечыже. Ожно ты кечын ӱдырамаш-влак шке тошто олым тӱшакыштым йӱлалтеныт. Михаил кечын вочшо лум телын вара толмыжо нерген шижтара.