Кечышот. 20 октябрь (шыжа)

Мо дене тиде кече шарнымашеш кодын? Могай лӱмлӧ еҥ шочмо кечыжым палемда? Тидын нерген «Кидшер» интернет-журналын материалыштыже.

Пайрем да шарнымаш кече-влак

  • Россий — Российысе сарзе-теҥыз флотын шочмо кечыже.
  • Россий — Сарзе связистын кечыже.
  • Организация Объединённых Наций — Статистик кече.
  • Авиадиспетчер-влакын калык-влак кокласе пайремышт.
  • Повар-влакын калык-влак кокласе пайремышт.

Событий

  • 1480 ий — летопись почеш «стояние на Угре» лӱман исторический факт лийын. Моско кугыжаныш татар-монгол-влак деч утлен. Йӧзакым тӱлаш чарнен.
  • 1714 ий — Пётр Первый кугыжа у кӱштыкым луктын: тудо Санкт-Петербург деч моло олаште кӱ полат-влак чоҥымым чарен.
  • 1880 ий — Цветной бульварыште верланыше Моско цирк икымше сеансым эртарен.

Шочыныт

  • 1925 ий — Анна Андреевна Саваткова, марий йылмызе, шанчызе, туныктышо, филологий шанче кандидат (1953).
  • 1926 ий — Андрей Андреевич Кудрявцев, артист да режиссёр. Шуко жап тудо Шкетан лÿмеш кугыжаныш драме театрыште пашам ыштен. 18 ий марий телевиденийыште режиссёр сомылым шуктен шоген.
  • 1928 ий — Василий Ижболдин, марий серызе, туныктышо, журналист.
  • 1930 ий — Сергей Иванович Иванов, марий сымыктыш пашаеҥ, серызе, артист, туныктышо, режиссёр, драматург, М. Шкетан лӱмеш Марий кугыжаныш драме театрын тӱҥ режиссёржо (1958–1974), И.С.Палантай лӱмеш Йошкар-Оласе музык училищын директоржо (1982–1998), Марий калык конгрессын Вуйлатышыже (2002–2005), Марий АССР-ысе сымыктышын сулло пашаеҥже (1963), РСФСР-ысе сымыктышын сулло пашаеҥже (1969). Марий тӱвырам вияҥдымаште тудын надырже моткоч кугу: 1963-шо ийыште Сергей Иванович икымше марий «Акпытыр» оперым шынден.
  • 1950 ий — Мария Илибаева (Мария Каликаевна Илибаева), марий серызе, журналист, туныктышо, Россий Серызе-влак ушемын йыжъеҥже, Марий Эл Республикын Калык серызыже.
  • 1956 ий — Антонида Ксенофонтовна Михайлова, ял озанлык пашаеҥ. Морко кундем Елейкино ялыште шочын. Паша корныжо шочмо велысе «Родина» колхоз дене кылдалтын: тыште тудо 26 ий ушкал лӱштышылан тыршен. Икмыняр гана Россий кӱкшытыштӧ эртаралтше ӱчашымаште сеҥыше радамыш лектын. Кӱшыл погынын депутатше лийын. Пашам тыршен ыштымыжлан Антонида Ксенофонтовна «Паша Чап» 3-шо степенян орден дене палемдалтын.

Калык пале

Сергий Печорскийын кечыже. Тиде кечылан лум возын гынат, пушеҥгысе лышташ-влакым онченыт: пушеҥгылаште лышташ эше шуко гын – теле саадак вашке ок тол.

Йолташ-влаклан палдараш
Кидшер
Шонымашым ешараш