Кечышот. 22 октябрь (шыжа)

Мо дене тиде кече шарнымашеш кодын? Могай лӱмлӧ еҥ шочмо кечыжым палемда? Тидын нерген «Кидшер» интернет-журналын материалыштыже.

Пайрем да шарнымаш кече-влак

  • Школысо книгагудо-влакын кечышт.

Событий

  • 1938 — изобретатель Честер Карлсон историйыште икымше гана ксерокопийым ыштен.
  • 1962 ий — Карибский кризис тӱҥалын. США-н президентше Джон Кеннеди Куба дене экономический кылым кӱрлын.
  • 1990 ий — Горький олалан тудын ончычсо лӱмжымак пӧртылтымӧ
  • 1990 ий — Марий Эл Республикын суверенный улмыжым увертарыме.

Шочыныт

  • 1896 ий — Яков Николаевич Тюлькин, Совет Ушем Герой. Тудо Марий Тӱрек кундем Руш Купта ялыште шочын-кушкын.
  • 1915 ий — Александр Ягельдин, марий серызе, туныктышо, 1941–1945 ийласе Кугу Ачамланде сарын участникше.
  • 1953 ий — Евгений Юрьевич Марков, Марий Элын сулло туныктыш пашаеҥже. У Роҥго кундем Шудасола ялыште шочын-кушкын. Илыш корныжым тудо спорт да капкылкультур дене кылден. 1988-ше ий гыч Кельмаксола кыдалаш школышто туныктышылан тыршаш тӱҥалын. Ялысе школышто таза кап-кылым шуарыме методик книган авторжо. Евгений Юрьевич кажне ийын тазалык да спорт фестивальым эртара – тидын денат кугу пагалымашым сулен.
  • 1954 ий — Александр Львович Маклыгин, семлызе, Россий Федераций сымыктышын сулло пашаеҥже Киров вел Куммер ял гыч. Шинчымашым Йошкар-Оласе музык училищыште, Озаҥ, Моско оласе консерваторийлаште поген. Ынде 30 ий наре Озаҥ оласе консеваторийыште туныктышылан пашам ышта. Профессор, композиций кафедрым вуйлатен. Александр Львович марий сем сымыктышым шымлымыж дене чапланен.
  • 1966 ий — Татьяна Викторовна Батракова, сӱретче Марий Эл кугыжаныш премийын лауреатше. Киров вел Ӱлыл Пузинер ялеш шочын. Паша корныжо 1988-ше ийыште тӱҥалын: курчак театрыште бутафор, оформитель лийын. 11 ий ончыч художник-постановщиклан тыршаш тӱҥалын. «После дождичка» спектакльлан кугыжаныш премийымат налын.

Калык пале

Яковын кечыже. Тиде кечын ожно телылан пуым ямдыленыт: пӱчкыныт, нӱжыныт руэныт, шелыштыныт…

Йолташ-влаклан палдараш
Кидшер
Шонымашым ешараш