Кечышот. 26 октябрь (шыжа)

Мо дене тиде кече шарнымашеш кодын? Могай лӱмлӧ еҥ шочмо кечыжым палемда? Тидын нерген «Кидшер» интернет-журналын материалыштыже.

Пайрем да шарнымаш кече-влак

Событий

  • 1932 ий — Совет Ушемын кӱшыл руководствыжо писатель Максим Горькийын мöҥгыштыжö погынен, вес писатель-влак дене вашлиймашым эртарен.
  • 1955 ий — Кечывалвел Вьетнам посна кугыжаныш улмыжо нерген увертарен, рӱдö олалан Сайгон шотлалтын.

Шочыныт

  • 1931 ий — Геннадий Николаевич Медведев, сӱретче. Шкеже Морко кундемысе Тыгыде Морко ял гыч. 1969-1971 ийлаште Морко калык театрыште постановщиклан тыршен. Вара Волгоград велыш каен. Ким Васинын, Валентин Колумбын да моло кумдан палыме марий еҥ-влакын портретшым сӱретлен. Кызыт Волгоградыште ила.
  • 1952 ий — Изибаев-Бирь, Алексей Русаевич, марий мурызо, Марий Эл Республикысе Олык Ипай лӱмеш Кугыжаныш самырыктукым премийын лауреатше (1998), Марий Эл Республикын сулло артистше (1998). Пытартыш жапыште паша корныжо Москонцерт дене кылдалтын. Эн сайын «Лилия», «Августысо писте», «Пиал корно», «Чевер сай» муро-влакше палыме улыт.

Калык пале

Иверский юмоҥан кечыжым палемдат. Ты юмоҥа ончылно еҥ-влак сурт-оралтым тул деч аралаш, неле-йöсылык годым чоным куштылемдаш йодын кумалеш.

Кидшер
Шонымашым ешараш