Кечышот. 28 октябрь (шыжа)

Мо дене тиде кече шарнымашеш кодын? Могай лӱмлӧ еҥ шочмо кечыжым палемда? Тидын нерген «Кидшер» интернет-журналын материалыштыже.

Пайрем да шарнымаш кече-влак

  • Автомобилистын кечыже.
  • Анимацийын тӱнямбалсе кечыже.

Событий

  • 1922 ий — Итальян фашист-влак Римым руалтен налаш маршыш тарваненыт.

Шочыныт

  • 1913 ий — Никандр Ильяков, курыкмарий серызе, почеламутчо, драматург, кусарыше, СССР Серызе-влак ушемын йыжъеҥже (1940), 1941–1945 ийласе Кугу Ачамланде сарын участникше.
  • 1918 ий — Дмитрий Александрович Халтурин, партий пашаеҥ. Оршанке кундем Покровск ялыште кресаньык ешеш шочын. Кугу Ачаэл сар корным эртен, лӱддымылыкым ончыктымыжлан, талын кучедалмыжлан герой лӱмым сулен налын. Шинчымашым чодыра озанлын политехник институтыштыжо, Моско оласе экономик инситутышто поген. 1936-шо ий гыч Санчурск да Оршанке школлаште математикым да физика предметым туныктен. Паша корныжо кугу вольтан аппаратура завод дене кылдалтын: тыште тудо вуйлатышыланат тыршен. КПСС-ын 23-шо съездшын делегатше лийын.
  • 1927 ий — Иван Никифорович Журавлёв, Украиныште паша герой, Марий республикын сулло машиначоҥышыжо. Кабардино-Балкарийысе кугыжаныш университетыште шинчымашым поген. Йошкар-Олашке 1973-шо ийыште толын да «Электроавтоматика» заводышто вуйлатышылан тыршаш тӱҥалын, оласе комитетыште, йӧндартыш министерствын пашаеҥже, а вара министр лийын. Кӱшыл погынын депутатше сомылымат шуктен. Тыршен пашам ыштымыжлан Иван Никифорович ятыр чап танык дене палемдалтын.

Калык пале

Ефимийын кечыже. Ожно калык тыге манын: «Ефимий пӱртӱсым телылан малаш пышта».

Йолташ-влаклан палдараш
Кидшер
Шонымашым ешараш