Йошкар-Олаште талантан йоча-влаклан «Волгенче» рӱдерым почыт

Марий Элым вуйлатыше талантан йоча-влаклан регионысо рӱдерын попечитель советын икымше заседанийжым эртарен.

«Волгенче» – у тунемме рӱдер лач тыге маналтеш. Тудын тӱҥ шонымашыже – самырык-влакын юмын пуымо моштымашыштым вияҥдаш йӧным ышташ. Каласыман, тыгай рӱдерым регионым вуйлатышын кӱштымашыже почеш почмо. Юрий Зайцев ик гана веле огыл палемден: регионышто илыше кажне йоча шке моштымашыжым ончыктен да вияҥден кертшаш, а кучемын задачыже – нунылан тидым ышташ полышым пуаш.

«Рӱдерым, «Талант да сеҥымаш» образовательный фондын опытшылан эҥертен, «Образований» национальный проектын «Кажне йочан сеҥымашыже» федерал проект почеш ышталтын. Тудо тиде направлений дене республикыште тӱҥ организатор да координатор лийшаш. Талантан молодёжь республикыштынак кодшо да кундемнан вияҥдыже манын, кучемын еҥже да наставникше семын ме чыла ыштышаш улына», – каласен регионым вуйлатыше

Рӱдерын пашажым виктарыше попечитель советыште – тудыжым Юрий Зайцев шкак вуйлата – «Талант да сеҥымаш» фондын «Сириус» тунемме рӱдержым вуйлатыше Елена Шмелёва да кучемын, промышленный предприятий, вуз-влакын еҥышт улыт. А рӱдерым вуйлаташ Елена Филипповалан ӱшаныме.

«Пашада шуко лиеш. Пырчым лукмо лончо кугу. Тиде кушкын толшо тукымлан кӱлеш. Паша кузе ворана –погынаш да иктешлымашым ышташ тӱҥалына», – каласен тудлан республикым вуйлатыше.

Талантан йоча-влак дене пашам ыштыме шотышто кум напрвленийым пеҥгыдемденыт: «Науко», «Искусство» да «Спорт». Самырык тукымын моштымашыжым вияҥдаш полшышо эксперт-влак коклаште университетын доцентше, палыме актёр да художник, тренер, тунемме верым да тӱвыра тӧнежым вуйлатыше-влак лийыт. Чылаже икшыве-шамыч дене 76 еҥ пашам ышташ тӱҥалеш, кажныже – профессионал.

«Марий Эл» газет

Кидшер
Шонымашым ешараш