Кечышот. 17 ноябрь (кылме)

Мо дене тиде кече шарнымашеш кодын? Могай лӱмлӧ еҥ шочмо кечыжым палемда? Тидын нерген «Кидшер» интернет-журналын материалыштыже.

Пайрем да шарнымаш кече

  • Студент-влакын тӱнямбалсе кечышт палемдалтеш.
  • Участковый-влакын пайремышт.

Событий

  • 1757 ий — Петербургышто художество институтым почмо.
  • 1869 ий — Пуш-влаклан ийын эрташ Суэцкий каналым почыныт.
  • 1948 ий — «Аврора» крейсерым сер воктеке шогалтеныт.

Шочыныт

  • 1925 ий — Анатолий Иванович Мосунов, почеламутчо, Кугу Ачаэл Сарын ветеранже. У Торъял кундемысе Антоново ял гыч. Сылнымут тӱняште кугу кӱкшытыш шуын: 10 сборникше савыкталтын. Ятыр марий поэтын произведенийыштым рушлашке кусарен.
  • 1922 ий — Клавдия Ивановна Козлова, шанче пашаеҥ. Кӱшыл шинчымашым Москосо кугыжаныш университетыште налын. 1947-ше ийыште марий калыкын историйжым, тӱвыражым шымлаш тӱҥалын. 50 наре научный пашан авторжо. Тудын пашаже-влак кокла гыч поснак марий калыкын этногенез йодыш дене кылдадтше эн кугу пашажым шотлаш лиеш. Тиде суапле пашажлан кугыжаныш чап танык денат палемдалтын. Историй шанче доктор, профессор.
  • 1925 ий — Анатолий Мосунов, серызе, почеламутчо, кусарыше, 1941–1945 ийласе Кугу Ачамланде сарын участникше.
  • 1936 ий — Евгений Степанович Стариков, семлызе, Россий Федерацийысе тӱвыран сулло пашаеҥже. Татарстан Республикыште шочын. Йошкар-Оласе сем училищым, вара пединститутым тунем пытарен. 1963-шо ий гыч Юлсер оласе музык школын вуйлатышыжлан тыршаш тӱҥалын. 120 наре произведенийын авторжо, баян да фортепианолан 14 пьесе сборникым, 3 муро сборникым луктын.
  • 1941 ий — Михаил Кузьмич Семёнов, эмлызе, Россий Федерацийын сулло эмлызыже. Татарстан Республикыште шочын. Озаҥысе мединститутым тунем лекме деч вара Марий Элыш толын: У Роҥго кундемын тӱҥ санитар эмлызылан 31 ий тыршен. Тиде суапле пашажлан ятыр чап танык дене палемдалтын.
  • 1950 ий — Людмила Николаевна Хохлова, актриса, Марий Элын сулло артисткыже. Медведево кундем Азаново селаште шочын. Паша корныжо 1980-ше ийыште Марий сем театрыште тӱҥалын, а кок ий гыч тудо Перьм оласе опер да балет театрышке куснен. Вердин «Травиатыштыже» Виолеттан, Глинкан «Иван Сусаниныштыже» Антонидан рольым устан чоҥен. Людмила Николаевна Марий опер да балет театр денат кылым куча.
  • 1954 ий — Сергей Витальевич Гуляев, спортсмен, Россий Федерацийын сулло тренерже. Йошкар-Олаште шочын-кушкын. Ятыр спорт школлаште дзюдо дене тренерлан тыршен. Тудын тунемшыже-влак кокла гыч нылытынже Россий Федерацийын чемпионжо лӱмым сулен. Сергей Витальевич дзюдо дене Совет Ушем сборныйын тренер-влак ушемыштат лийын.

Калык пале

Никандр да Еремейын кечыже. Ожно ты кечын пöрт кöргыштак шинченыт, амал деч посна уремыш лекташ тыршен огытыл. Вес йÿламат шуктеныт: еҥлан тулым пуэн огытыл – чырамат, сортамат шылтеныт.

Йолташ-влаклан палдараш
Кидшер
Шонымашым ешараш