25 ноябрьыште Марий кугыжаныш университет 50 ияш лӱмгечыжым палемден. Марий Элым вуйлатыше Юрий Зайцев тиде кугу событий дене вузышто вуйлатыме пашам шуктышо, туныктышо да студент-влакым саламлен.
Тудо палемден: «Таче МарГУ– ончыл, шанче да инноваций разработко шотышто чапым налше, пагалыме лидер. Вуз кӱшыл образований системыште кугу сеҥымаш дене куандара, тудын сай материально-технический базыже уло, кӱкшӧ квалификациян туныктышо-влак тыршат да тачысе илышлан келшыше специалист-шамычым ямдылен луктыт», – палемден тудо.
Юрий Зайцев ешарен: кызыт Марий кугыжаныш университетыште Российын 63 регионжо да тӱнян 45 элже гыч 10 тӱжем утла студент чумыр налмаште 100 направлений дене тунемеш. Тидын деч посна вуз «Приоритет 2030» федеральный программын участникшылан шотлалтеш.
Вашлиймаш годым Юрий Зайцев университыште пашам ыштыше икмыняр еҥым сулымо наградышт дене палемден. Тыге ты кечын «Марий Эл Республикысе образованийын сулло пашаеҥже» почётан лӱмым биохимий, клеточный биологий да микробиологий кафедрын профессоржо Виктор Самарцевлан пуэныт. Тыгак Марий Элым вуйлатышын Тауштымашыж дене тӱҥалтыш педагогике да общий образований кафедрын доцентше Наталья Бирюковалан, тунемме-методике виктемым вуйлатыше Ирина Бояринцевалан, отечественный историй кафедрын профессоржо Алексей Ивановлан, педагогический институтын директоржо Елена Кондратенколан, тӱвыра да сымыктыш кафедрын профессоржо Галина Шкалиналан кучыктеныт.
Каласыман, Марий кугыжаныш университет республикыште фундаментальный науко, медицине, педагогический образований, ялозанлык, тӱвыра да сымыктыш, физкультур да спорт, электроэнергетике, гуманитарный науко областьлаште кӱкшӧ квалификациян кадрым ямдылыше вуз икте гына. Тунемме верыште мландым дистанций йӧн дене зондироватлыме бортовой радиолокаций комплексым ыштыме областьыште Инжиниринг рӱдер уло. А тений вузышто у эм препаратым ямдылыме шотышто Шанче-шымлыме лабораторий почылтын. Тидын деч посна 2022 ийыште Печатный платым да кадрым ямдылыме шотышто рӱдер, Сити-фермерстве дене экспериментальный лабораторий почылтыныт. Марий кугыжаныш университет тидын дене огеш серлаге: жап дене тӧр умбакыже вияҥеш.
«Марий Эл» газет