Марий Эл Радиолан – индеш ий темеш!

Марий Эл Радио шке пашажым 2005 ий 1-ше июльышто тӱҥалын. Икымше гана эфирышке Мурызо Эчан (Александр Кожевников) лектын. Тачысе кечылан радиошто Наташа Пушкина, Володя Матвеев, Марина Глушкова, Валерий Очеев, Ирина Якаева, Александр Кожевников, Владимир Аптулаев, Александр Кожевников, Михаил Пирогов да Сергей Карпов тыршат.
Марий Эл Радиом таче ятыр тӱжем ешыште эр гыч кас марте колыштыт. А кушто гына радион йӱкшӧ огеш шокто: мӧҥгыштӧ, пашаште, машина дене кудалме годым, сад-пакчаште, эсогыл тӱрлӧ-тӱрлӧ предприятийыштат Марий Эл Радион йӱкшӧ йоҥга. Эфирыште тӱрлӧ виктышыште, сферыште тыршыше еҥ-влак дене программым колышташ лиеш, вӱдышӧ-влакат калыклан оҥай программым ямдылаш тыршат, эфирыште тӱрлӧ сынан марий муро йоҥга, оҥай конкурс-влак эртаралтыт. Марий Эл Радио пӱтынь Марий кундемым авалта, но радиом вес эллаштат интернет полшымо дене колыштыт. Мутлан, мемнан сайтыштат Марий Эл Радиом колыштын сеҥеда. Радио марий сынан CD, mp3, DVD диск-влакым калыклан темла. Калыкыште Марий Эл Радио тӱрлӧ концертым эртарыме дене палыме. 2010 ий гыч «Идалыкысе муро» концерт-фестиваль, Пеледыш пайремыште марий танцполым эртарат. Тыгак ятыр ий районлашке тӱрлӧ сынан концерт-программе дене лектын коштедат. Ынде индеш ий кажне кеҥежым калыкым Йошкар-Оласе стадионлаште чумырат: ончыч «Строитель» стадионышто погыненыт, калык шуко погынымылан кӧра, пытартыш ныл ий «Келшымаш» стадионышто марий шӱлыш озалана. Теве теният тыгай пайрем 26 июльышто «Келшымаш» стадионышто эрташ тӱҥалеш.
Кажне ийын концерт-программе оҥайын эртаралтеш. Концертын организатор-влакын мутышт почеш, ончаш толшо-влакым фольклор, шуко у эстраде муро, мурызо куандараш тӱҥалыт. Тугеже толза «Келшымаш» стадионышко 26 июльышто, концерт 18:30 тӱҥалеш.
P.S. Кузерак концерт эртен тыште лудса…

Автор: Николай Любимов

Кидшер
Шонымашым ешараш