Мер илыш: Вуйлатышыже тудак!

30 январьыште Марий калык конгрессын отчет да сайлымаш конференцийже эртен.
2002 ийыште шочшо у мер организацийым ятыр жап Марий самырык театрын директоржо Э.Александров вуйлатен. Тиде конференцийыштат делегат-влак конгрессым вуйлаташ ынде визымше гана тудланак ӱшаным ыштышт. Исполкомышто але марте 33 еҥ лийын гын, кызытсе составым 22 марте шагалемдышт да тушко у еҥ-влакымат пуртышт. Председательын алмаштышыжлан (тудак исполкомым вуйлатыше) Марий Эл радион редакторжо Н.Пушкинам сайлышт. 
Калык конгрессын идалыкаш пашаж дене вуйлатыше Э.Александров, пӧлкам вуйлатыше-влак Л.Михеева (Параньга район) ден Е.Небогатиков (У Торъял район) палдарышт. Палемдымышт почеш, Мер Каҥаш дене пырля теве могай мероприятий-влакым эртареныт: «Шочмо кундемын семже» (Килемар), Турек пазар (Марий Турек), «Акпарс радиолан – 5 ий» (Козьмодемьянск), Сонарзе биатлон (Оршанке), В.Рожкинын шочмыжлан 100 ий теммылан шарнымаш кече (Звенигово), Токтар Онарлан стеллым шогалтымаш (У Торъял), Марий талешке кече, Пеледыш пайрем да молат. Любовь Леонидовна мер пашаште ик эн кугу сеҥымашлан законодательный кучемыште марий-влакын чотыштым кугемден кертмым шотла. Шке жапыштыже район погынымаште кум депутат веле лийын гын, кызыт латкандашыж гыч латкокытын марий улыт. Тыгак нунын радамыште самырык-влак шукемыныт. Ял шотан илем кӱкшытыштат самырык депутат-влак улыт.
Ревизий комиссийым вуйлатыше Г.Куликовын палемдымыж почеш, идалык жапыште Марий калык конгрессын счетышкыжо пурышо окса гыч утларак ужашыжым Марий форумын шошо ден шыже сессийже-влакым эртараш, Тӱвыра идалыкым иктешлыше книгам савыкташ кучылтмо.
Конгрессын еҥже-влак 2015 ийлан паша планым пеҥгыдемденыт. Марий Элын культур, печать да калык-влакын пашашт шотышто министрын алмаштышыже Г.Ширяева пӧлкам вуйлатыше-влак Л.Михеева ден Е.Небогатиковлан министерствын Чап грамотшым кучыктен.

Светлана Пехметова. Денис Речкинын фотожо.
«Марий Эл» газет. «Марий Эл» ГТРК. 

Кидшер
Шонымашым ешараш