«Ончыко» журналын ӱшанле таҥже-влак тенийлан икымше номернам вучен шуктеныт. «Редактор шомак» рубрикыште Анатолий Тимиркаев лудшо-влакым тенийсе Сылнымут идалык дене саламла.
Поэзийым аклыше-влаклан поэт А.Васильевын «Мый иленам кок курым ушнымаште…» почеламут аршашыжым лудаш темлена. Тыгак И.Лобановын, Л.Муфтахован, О.Кутасован пытартыш жапыште возымо почеламут корнылаштым да А.Сапинын басньыже-влакым шергал лекташ оҥай лиеш.  Чапланыше марий поэт А.Январёв-Чатлама ила гын, тений 100 ийым тема ыле. Ю.Соловьев тудын нерген статьям возен, почеламут-влакшымат савыктенна. Вес палыме поэт, журналист, Кугук Ачаэл сарыште вуйжым пыштыже В.Элмарын шочмыжлан кодшо тылзын 105 ий темын. Тудын нерген очеркым Г.Зайниев возен. Кажне гаяк тылзын журналын лаштыклаштыже кумдан палыме марий еҥ-влак нерген каласкалена. Январьыште лекше журналыште «Лӱмгече» рубрикыште марий калыкын ик эн лӱмлӧ профессоржо Ксенофонт Сануков дене вашмутланымашым вераҥдыме. Ксенофонт Никанорович 5 февральыште 80 ийымат темен.
«Лудыш» рубрикыште, очыни, чыланат А.Богдановын «Илышлан кӧра» романжым вучат. Мо дене тиде произведений пыта — журналым налмеке пален налыда. Тиде рубрикыштак З.Тимирбаева-Аршашын «Эртыше ӱмыр» ойлымашыжым лудын кертыда.
Лудшо-влакын ик эн йєратыме рубрикышт — «Якшывай пусак». Тиде ганаят тудым лудмеке «мӱшкыр кучен» воштылаш лиеш. О.Микк «Кузе мый «служенам» шарнымаштыже салтак илышыж гыч тӱрлӧ оҥайым каласкала, а Э.Анисимов «Пилюля» ойлымашыште, кызытсе йылме дене ойлаш гын, «офисный планктоным» воштылеш да туныкта.
Тылеч посна журналын икымше номерыштыже тӱвыра илыш гыч очерк, шанче статья, у книгалан рецензийым муаш лиеш. Тыгак «Муралтена веселан» у рубрикым почынна.
Марий Элысе почтылаште «Ончыко» журналлан подписке ак – 311 теҥгеат 50 ыр. Кӧ, редакцийыш толын, подпискым ышта, ак 198 теҥге лиеш, а ик ийлан – 360 теҥге. Икманаш, налза «Ончыко»журналым.

«Кидшер» интернет-журналлан уверым
Игорь Попов возен.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.