Кумдан палыме писатель Майоров-Шкетанын мутшо почеш, «Марий йылмым пеҥгыдемдыме шотышто сылнымут пеш кугу пайдам конда». Чынак, сылнымут — илышым чын умылаш туныкта. Сылнымут — шонаш тарата. Сылнымут шортара, куан кумылым луктеш.
Шочмо йылме кече вашеш Национальный президент школышто моткоч поро вашлиймаш эртыш. Школышто шинчымашым погышо ӱдыр-влак, туныктышо коллектив да самырык тукым «Сылнымут батлыште» таҥасышт, шке почеламутым лудмо мастарлыкышт дене палдарышт. Шонаш таратышт, ӧрыктарышт, шинчавӱдым луктыч. Сылнымут касыште тӱҥ шотышто Макс Майнын, Зоя Вис-висын, Михаил Якимовын, Валентин Колумбын, Игорь Поповын почеламутышт йоҥгышт… Талант памаш лӱддымӧ.
«Сылнымут батл» икмыняр тапыр дене эртен. Почеламутым лудмо деч посна, жюри прозым лудмо мастарлыкымат аклен. Жюрин еҥже, поэтессе, школын директоржо Лидия Иксанова дечат посна заданий лийын. Конкурсыш ушнышо-влак дактиль, амфибрахий да анапест сылнымут размер-влак дене почеламутым возеныт. Вич минут жапыште почеламут корнылам шочыкташ манаш веле. Кажне командын мурпогыжо ойыртемалтше лийын.
Пытартышлан команде-влак викторинысе йодышлан вашмутым пуэныт. Организатор-влакын палемдымышт почеш, почеламутым лудмо мастарлык дене Национальный президент школын тунемшыже-влак ойыртемалтыныт. Конкурсыш ушнышо-влак чыланат книга пӧлек дене палемдалтыныт.
Пӧлекым тыгак «Марий Эл» газет редакций ыштен. Журналист Светлана Пехметова, жюрин председательже семын, участник-влаклан сай акым пуэн. «ВийАр» тӱвыра кыл ушемын чолга еҥже-влак да Национальный президент школ сылнымут идалыкыште ятыр вашлиймашым, акций-влакым эртараш палемденыт.

Автор: Алёна Иванова,
«Кидшер» интернет-журналын редакторжо.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.