Пагалыме йолташ-влак! Армийын ветеранже-влак!
Марий Мер Каҥаш да Марий Эл Кугыжаныш Погын лÿм дене чыландамат Отечествым (Ачамландым) аралыше-влакын кечышт дене алал кумылын саламлем!
23 февральыште, кумда Россий мучко патриот шÿлышан чын пöръеҥ-влакым саламлат. Пÿтынь калык тиде кечын шочмо элнам аралыше але салтак радамыш шогалаш ямдылалтше, тыгак ветеран да салтак-интернационалист-влакым чапландара. Тиде кечын ме Российысе военнослужащий-влаклан веле огыл, тыгак Кугу Отечественный сарын ветеранже-влаклан, тÿрлö жапыште локальный сарлаште лÿддымын кучедалше, а кызыт тыныс пашаште тыршыше пöръеҥ-влакланат кугу таум ойлена да мланде марте вуйнам савена.
Марий калыкнат ятыр лÿддымö да тале эргыж дене чаплана. Нуно Кугу Отечественный сарыште, Афганистаныште, Чечняште да моло кундемысе сöй пасушто шкеныштым чаманыде кредалыныт. Арам огыл нунылан Совет Союзын да Российын Геройжо кÿкшö лÿмым пуэныт. Элнан эрыкшым да чапшым аралымаште чолгалык ден пеҥгыдылыкым ончыктышо пöръеҥ-влак курым-курымеш геройло пример лийын кодыт. Нунын примерышт почеш ме самырык тукымым патриотизм шÿлышеш шуарена.
Тачысе кечын элнам аралыше-влак радамыште Кугу Отечественный сарыште шочмо элнан эрыкше верч геройла кучедалше салтак-влакын шочшышт ден уныкашт нунын семынак пеҥгыдын шогат да серыпле йÿлаштым ÿшанлын шуктен толыт. Ме нунын дене кугешнена.
Шочмо элнам да тыныслыкым арален шогаш эре ямде улшо йолташ-влак! Ончыкыжымат тыныс илыш верч тавадаҥ шогаш, шкенан кумда элнам — Российым, марий кундемнам, калыкнам пагалаш да аралаш, а самырык тукымым патриотизм да кугезе марий шӱлышеш шуараш ӱжам.
Чылаландат тынысле яндар кавам, пеҥгыде тазалыкым, кужу ӱмырым, вашла пагалымашым да пиалым тыланем.
Пайрем дене!

Марий Оньыжа,
Марий Эл Кугыжаныш Погын
вуйлатышын алмаштышыже
Анатолий Николаевич Иванов

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.