22 февральыште Советский районысо Ӱшнӱр кыдалаш школ пелен, Республик кӱкшытан йоча Ӱярня пайрем эртен.
Йоча-влаклан пӧлеклалтше Ӱярня пайремышке республикнан 14 школжо гыч 140 утла йоча ден туныктышо погынен. Пайремым почмаште шке саламлымаш шомакыштым Республикысе марий тӱвыра рӱдерын алмаштышыже Римма Юрьева да Ӱшнӱр кыдалаш школын директоржо Валерий Галкин ойленыт. Пайрем жапыште йоча-влак тӱрлӧ модыш дене модыныт, чыланат весела кумылан лийыныт. Теве Советский районысо Ӱшнӱр кыдалаш школын тунемшыже-влак Ӱярня пайремыште кажне еҥын кумылжым нӧлталын кертыт. Арам огыл, нуно «Ӱярня модыш – 2015» конкурсышто сеҥыше радамышке лектыныт. А «Ӱярня кува – 2015» конкурсыш чылажге 13 курчак «толын». Икымше верыш Оршаҥге районысо Кугунур школын Ӱярня куваже лектын. «Ӱярня мелна 2015» конкурсыш 50 наре тӱрлӧ мелнам кӱэшт конденыт. Тиде конкурсышто Морко районысо Шоруньжа школ ойыртемалтын. Нуно Ӱярнян шым кечыжлан, шым тӱрлӧ мелнам кӱэштыныт. Ӱстелым кӱлеш семын сылнештареныт да чыла тидым калыклан чын ончыктен моштеныт.
Эртыше пайрем кажне йочан да кугыеҥын ушыштыжо да чоныштыжо сай, весела да поро кумылым гына коден.
Республикысе йоча-влаклан Ӱярня пайремым Марий Эл Республикысе тӱвыра, печать да калык-влакын пашашт шотышто министерстве, Шинчымаш да шанче министерстве, Республикысе марий тӱвыра рӱдер, Советский районысо Ӱшнӱр школ эртареныт.
Эше фотосӱрет-влакым тыште ончен кертыда.

 

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.