Марий кугыжаныш университет ден республикысе Образований да науко министерстве самырык журналист-влаклан «Журналист лий — 2015» республикысе конкурсым эртарат. Тышке Марий Элысе школлаште 9-11-ше класслаште тунемше-влакым ушнаш ӱжыт.
Йодмашым да возымо пашам МарГУ-со историй да филологий факультетын журналистике кафедрышкыже 13 март марте пуыман. Тидым jur@marsu.ru электрон почто дене «На конкурс юных журналистов» пале дене колташ, серышым 424001, Йошкар-Ола, Пушкин урем, 30-шо пӧрт, «Г» корпус адрес дене возаш але шке намияш лиеш. Лекше йодышым (8362) 68-80-44 телефон дене рашемдаш йӧн уло.
Конкурсыш ик еҥ ик пашам гына пуэн кертеш, тыгодым тӱшкан ыштыме возымо ончалташ ок тӱҥал. Журналист материалым рушлат, марлат сераш лиеш. Тунемше кеч-могай жанрыште возен кертеш. Кажне паша оҥай, ойыртемалтше вуймутан лийшаш. Организатор-влак икмыняр темым темлат:
- Журналист да Кугу Отечественный сарыште сеҥымылан 70 ий темме лӱмгече;
- Журналист да Сылнымут идалык -2015;
- Марий журналистикын ончыкылыкшо;
- Кызытсе тӱняште информацийын верже;
- Возымо эрык: кӱлеш мо тудым шыгыремдаш?
Конкурсант-влакын очный творческий таҥасымашышт университетыште 25 мартыште эрташ тӱналеш. Эн сай паша-шамыч «Молодежная жизнь в Марий Эл», «Марийский государственный университет» периодике печать изданийлаште да МарГУ-со историй да филологий факультетын «Глаголь» ден «Лестница» газетлаште печатлалтыт.
Автор: Лидия Шабдарова.
Уверым «Марий Эл» газет гыч налме.