Калыкыште ойлат: «Паша айдемым сӧрастара, а ура чонан еҥ кеч-могай пашамат ворандара». Марий Эл Кугыжаныш теле да радио компанийын корреспондентше, Мер каҥаш председательын алмаштышыже, «ВийАр» тӱвыра кыл ушемын еҥже Алёна Ивановалан нине шомак-влак утларак келшен толыт, очыни.
Таче, 5 мартыште Волжский районын чолга ӱдыржӧ Алёна Иванова шочмо кечыжым палемда.  Тиде кечын тудым шуко родо-тукымжо, йолташыже, коллегыже да тыглай марий еҥ саламлаш вашкена. Вет, чынже денак, поро чонан марий ӱдыр шочмо марий калыкшылан кертмыж семын эреак полшен шога. Марий самырык тукымлан ыштыме пашажым аклыде огешат лий.
Алена ИвановаАлёна Иванова Волжский район Памашэҥер ялыште марий интеллигенций ешыште шочын-кушкын. Ачаж, аваж велымат тукым гыч тукымыш туныктышо, вуйлатыме пашаште тыршыше-влак улыт. МарГУ-н историй да филологий факультетшын журналистике пӧлкаштыже тунемме жапыштак Марий телевидений ден радио пашаш, мер толкыныш ушнен. 2008 ийыште ышталтше «ВийАр» тӱвыра кокласе кыл ушемым вуйлатен, МАФУН-ышто Марий Эл деч координатор лийын. Марий телевиденийым ончышо-влаклан «Пошкудем», «Шӱмсем пӧлек» передаче-влакын вӱдышыжӧ, марий калыкын илыш-йӱлаж дене палдарыше икмыняр фильмын авторжо семын палыме. Мер пашажлан С. Чавайнын шочмыжлан 125 ий темме «Калык верч тыршымаш» шарнымаш медаль дене палемдалтын. 2014 ий мучашыште Олык Ипай лӱмеш премийын лауреатше лӱмым сулен налын. 2015 ийыште Вячеслав Абукаев лӱмеш «Ший памаш» премийын лауреатше лийын. Финн-угор калык-влакын II тӱнямбалысе кинофорумжо гыч (FUFF) Алёнам тӱнямбал кӱкшытысӧ жюри спецприз дене палемден.
«Кидшер» интернет-журналын коллектившат Алёнам сылне пайремже дене шокшын-шокшын саламла да пеҥгыде тазалыкым, волгыдо вий-куатым, йӧратымашым, ончыкшымат кугу деч кугу сеҥымашым тыланен кодына. Алёна, умбакыжат марий калык верч тыгакак чолган тыршен шого.

Саламлымаш дене «Кидшер» интернет-журналын коллективше.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.