Зоя Дудина шке лудшыжо-влаклан моткоч чапле пӧлекым ямдылен. Почеламут, очерк, шонкалымаш, интервью – икманаш тӱрлӧ жанр дене возымо ойпогыжым кум томыш чумырен: «Куанышым, куэм ӧндал…», «Шийгорнышто» да «Чӱчалтыш ӱшан».
Икымше том 2012 ийыште Марий Элысе тӱвыра, печать да калык-влакын пашашт шотышто министерствын «Массовый информаций да книга лукмо пашам 2009-2013 ийлаште вияҥден колтымо» целевой программыже почеш савыкталтын. Тышке почеламут-влак пуреныт.  «Шийгорнышто» лӱман кокымшо томыш – очерк-влак. Полышым А.Кастрен ушем пуэн. Книга 2014 ийыште лектын. Кумшо томышто авторын кусарыме произведенийже-влакым лудаш лиеш. Тиде том ӱмаштак У ий вашеш савыкталтын.
5 мартыште Т.Евсеев лӱмеш калыкле тоштерыште Зоя Дудина шке лудшыжо-влак дене вашлиймашым эртарен. «Кум томан ойпого» книга-влакын презентацийышт лийын.
Зоя Михайловна сылнымут касышкыже тудын поэзийжым йӧратыше, пагалыше да аклыше, шкеж гаяк поро кумылан еҥ-влакым чумырен. Т.Евсеев лӱмеш калыкле тоштерын директоржо Лидия Смирнова, писатель Мария Илибаева, «Ямде лий» газетын тӱҥ редакторжо Лидия Семенова, «Кидшер» интернет-журналын тӱҥ редакторжо Николай Любимов, «Марий Эл» газетын корреспондентше Светлана Пехметова, Марий Кугыжаныш университетын доцентше Валентина Гаврилова, поэтессе Надежда Никитина да моло толшо уна Зоя Михайловна нерген поро деч поро шомакым ойлышт.
Российын сулло, Марий Элын калык артистше Маргарита Медикова поэтессын почеламутшо-влакым лудын пуыш, Марий Элын сулло артистше Любовь Купсольцева авторын возымо почеламутшылан келыштарыме мурым йоҥгалтарыш.
Зоя Михайловна кызыт тӱҥ шотышто кусарыме пашам шуктен шога. Самырык возышо-влак дене шуко пашам ышта, эре ой-каҥаш дене полша. Зоя Михайловнан усталык корныжо умбакыжат кугу лектышан лийже.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.