Марий wiki-толкын вияҥеш, но…

Мо тугай википедий, чылан паледа, очыни. Кӧ огеш пале гын, википе́дий — эрыкан, пырля ыштыме шуко йылман интернетыште улшо энциклопедий. Кызыт кажне кумылан еҥ википедийыш пурен, чыла лаштыкыш тӧрлатымашым пуртен кертеш. Историйыш ончалына гын, англичан википедийым 2001 ийыште Джимми Уэйлс да Ларри Сенглер тӱҥалыныт. Кызыт википедий эн кугу да калыклан палыме интернетыште улшо эрыкан энциклопедий. Изи калыклан гын, википедий тиде кугу да кӱлешан площадке, йылмым  да йӱлам  аралаш пеш сай ӱзгар. Кызыт марий йылме дене гына кок википедий уло: олык марий — mhr.wikipedia.org да курыкмарий йылме дене — mrj.wikipedia.org.
Олык марий википедийлан неггызым 2009 ийыште сӱрем тылзын 10-шо  кечынже пыштеныт ыле, а курык марий википедийым 2010 ийыште шыжа тылзын 17-ше кечынже почмо.
Тачысе кечылан, олык марий-влак шке википедийыштым шукырак пойдарен шогат, тидын нерген мыланна сайтыште «Пытартыш тӧрлатымаш-влак» лаштык ойла. Каласен кодыман, олык марий-влакын википедийыштышт 7232 лаштык уло, а курык марий-влакын 7191 лаштык. Тиде изирак куаным луктеш, но куанашыже нимолан.  Марий википедийым вияҥдаш, умбакыжымат пойдараш еҥ-влак уке улыт. Ончыкшым неле сӱрет палдырнен кертеш, вет википедий – тиде калыкын (нацийын) ончыкылык тукымжылан возен кодымо тӱрыс шинчымашыже, историйже. Ме (марий-влак) ончыкылык тукымланна мом кодена?!

Автор: Николай Любимов, марий блогер.

Кидшер
Шонымашым ешараш

  1. Sukso

    Поро лийже! Ыштышаш паша моткоч шуко, шокшым кергалтен, кӱлешан пашам ыштышыже, чынжымак, моткоч шагал. Ала ӧрмалген аптыраныше калык улына, ала йолагайрак… Шукыж годым ӧрдыж гыч шекланен ончышо улына, а шке кыртмен мом-гынат кӱлешаным илышыш шыҥдараш, ончыкылык тукымлан кодаш тыршаш шотна шагалрак, витне. Wiki-толкын, чынак, илыш летопись, манам гын, йоҥылыш ом лий, шонем. Самырык тукым тыште чулымрак лиеш гын, моткоч сай ыле, вет интернетыште утларак нуно шинчат. НО…ала жап ок сите, ала кумыл уке, ала… (кӧ пала эше могай вес амаллан кӧра) ты паша ик верыштак шога.Туге гынат, мыйын шонымаште тукым гыч тукымыш самырык калык эре ончылно лийын, у пашаште шкенжым эн ончыч самырык еҥ терген. Марий Wiki-толкыныш шке надыржым самырык тукым пышта гын, моткоч сай лиеш ыле. Самырык тукым слёт-влак эртаралтме годым тиде йодышым лончылыман, очыни.

    Ответить
    1. viktaryshe автор

      Марий кугыжаныш университетыште 1 апрель гыч «Марий йылме» шанче-шинчмаш да йылме технологий рӱдер пашам ышта. Лачшымак тудо марий wiki толкыным вияҥдаш тӱҥалеш…

      Ответить
  2. Ончысо студент

    Сай темым тарватыме, но йодыш лектеш, МарГУ-што ончыч студент-влаклан википедийыш кузе увер-влакым шындылаш, кузе тӧрлалтылаш туныктат ыле, кызыт студент-влак тиде пашам шуктат мо?

    Ответить
  3. Ирина Иванова

    Тиде йодышым шукертак нӧлталман ыле, кызыт гына обществылан шуын мо? Ынде мом ыштыман? Моло финн-угор калык-влакын ончалза могай Википедий, а мемнан могай? Николай чын возенат, ончыкылык тукымланна мом кодена?

    Ответить