У йӧн-влак деч посна — шеҥгелан кодына!

Жап эрта, чылажат вашталтеш. Илыш кажне пашаште у технологийым, йӧным кучылташ йодеш. Шинчымаш аланыштат  у йӧным, программым кучылтде огешат лий.
Теве 25 мартыште Советский районысо Ӱшнӱр кыдалаш калыкле школышто марий  йылме да литератур туныктышо-влаклан «Ялысе школышто марий йылмым туныктымаште ИКТ технологийым  кучылтмаш» семинар эртен.
Семинарын программыжым Ӱшнӱр кыдалаш школын директоржо Галкин Валерий Фёдорович торжественно почо. Варажым программе почеш тиде школын марий йылмым да литературым туныктышыжо  Волкова Зинаида Александровна виш урокым эртарыш.
Урокышто тӱҥ темылан тӱрлӧ сложный предложенийым иктешлымаш шотлалтын. Тунемше-влак тӱрлӧ пашам ыштеныт тидлан электрон мутерым, интернетысе чын возыктыш программым кучылтыныт.  Каласен кодыман, 11 классыште тунемше-влак сӱрет почеш изирак марла мутерым ямдыленыт. Мо оҥайже, сӱретан мутер йыгырмут гыч шога. Мут-влакым марий, руш да англичан йылме дене лудаш лиеш.  Виш урок тунемше да толшо туныктышо-влаклан келшен.
Умбакыже оҥай занятийым «Кидшер» интернет-журналын тӱҥ редакторжо Николай Любимов эртарен. Тудо интернетыште улшо марий сайт, блог-влак, «Кидшер» интернет-журналын пашаже нерген палдарен.
Каласен кодыман, марий лингвист Андрей Чемышев туныктышо-влаклан марий йылме корпус, марий online мутер-влак нерген кумдан да келгын каласкален.
Марий Эл Республикысе Инноваций да тунемме качествым эскерыше рӱдерын Татьяна Зуева марий туныктышо-влаклан йоча-влакым туныктымо годым LearingApps.org дене кузе пашам ышташ умылтарен.
Ӱшанен кодына, эртыше семинарын лектышыже изи огыл лиеш. Вет тачысе кечын тунемше-влаклан марий йылмылан, сылнымутлан кумылаҥдаш у метод-влак чынжымак кӱлыт.

Автор: Николай Любимов, марий блогер
Владимир Виногоровын фотожо-влак.

Кидшер
Шонымашым ешараш