Шочмо йылме – калыкын чон поянлыкше, но тӱрлӧ шанчызе-влакын палдарымышт почеш, ятыр Российысе финн-угор калыкын йылме поянлыкышт коло икымше курымым илен огыт лек, очыни. Тидыже шагал чот дене улшо калык-влаклан пеш лӱдыкшӧ, вет йылмызе-влак нине йылме-влаклан коло-кумло ийым гына пуат. Чаманен каласаш логалеш, ятыр лингвист-влак марий йылмыланат шуко огыт пу, а марий йылмым нылле-витле ий гыч мо вуча? Йылмым йомдарымаш – тӱнямбалсе тӱвыра поянлыклан пеш кугу ойго.
Коло икымше курым – технологий курым. Шке пашаштына у технологийым, йӧным кучылтына, а вет у технологий йылмым, тӱвырам да йӱлам аралаш пеш сай йӧн. Тачысе кечылан онлайн мутер, чын возышым тергыше системе да тулеч моло полшык дене пайдаланена.Марий йылме корпусна лиеш гын, йылмынан кӱкшытшӧ, кӱлешлыкше сайрак шижалташ тӱҥалеш. Мутлан, тачысе кечылан, коми йылмын корпусшо 10 миллион утла мут гыч шога, 2015 ий мучашлан — 20 миллион мут лиеш. 1920 ий гыч тӱҥалын тачысе кече марте чыла возымо савыктыш-влакым чумырымо. Кӧ огеш пале гын, йылме корпус — тиде увер, тӱрлӧ текст-влакым электрон формо дене погымо келыштарыме базе.
Марий йылме корпус дене профессионал лингвист, туныктышо, студент ден преподаватель, тӱвыра, шинчымаш аланыште тыршыше да шымлыше, йот элласе еҥ-влаклан пеш инструмент. Журналист, йылмызе, мер пашаеҥ, блогер, студент-влак марий йылме корпусын кӱлмыж нерген икмыняр тылзе ынде мутланат. Вержымат темлат, йылме корпус МарГУ, МарНИЯЛИ, С. Г. Чавайн лӱмеш калыкле книгагудышто вераҥдаш темлат. Тидыже пеш шерге оборудований, садлан тиде йодыш эше рашемдалтын огыл. Туге гынат, шочмо йылмым аралаш да вияҥден колташ тиде пеш сай полшык.
Мо оҥайже, Германийыште контактдыме сканер кажне книгагудышто уло. Пошкудо Коми республикыште нылыт уло гын, а Марий Элыште иктат уке.
Автор: Николай Любимов, марий блогер.
«Молан йылме корпус кӱлеш, лучо эше ик черкым Йошкар-Олаште ыштена»- тыге Марий Элын президентже да правительстве шона, очыни.