Книгагудо йӱдымат уна-влакым вашлийын!

С.Г. Чавайнын книгагудыштыжо вӱдшор тылзын 24-ше кечынже ятыр калык погынен ыле. 18 шагат гыч 23 шагат йӱд марте «Книгагудысо йӱд — 2015» («Библионочь — 2015») мероприятий эртыш.
Книгагудыш пурымеке, ты касыш толшо-влакым фойеште мурымаш да куштымаш, пайрем кумылым тыланыше вашлиймаш вучен.  А вара, кажне еҥ шкенжын чон йодмо почеш тӱрлӧ акцийыш, мастер-классыш  ушнен, выставкым ончалын, экскурсий дене книгагудышто эртен кертын. Изирак-влакым блиц-турнир ден викторине-влак вученыт.
Тиде кастене «Книгагудыш возалт» акций лийын. Кажне кумылан айдеме лудшо радамыш ушнен, книгам лудшын билетшым яра налын кертын.
«Пӧртылтымӧ книга» акций шке жапыштыже пӧртылтыдымӧ книгам штраф деч посна книгагудыш кондаш йӧным ыштен. «Библиокафеште» кофем йӱын, каналтен, книга ден журнал-влакым шергалаш йӧн лийын да тылеч моло шуко оҥай да моткоч кӱлешан акций ден ончер-влак пашам ыштеныт.
«Поэта сердце в дар примите!..» поэтический салоныш «Патриот» литературсо-сылнешке ушемын возкалышышт, поэтышт-влак вученыт. Шке возымо да йӧратыме поэт-влакын почеламутыштым лудаш кумылан-влак шукын лийыныт. Тиде мероприятий 3 пачашын 38-ше пӧлемыштыже эртен гын, 65 пӧлемыште калыкле да краеведений пӧлкаште «Марий сылнымутышто самырык вий» кас марий сылнымутым йӧратыше, аклыше, пагалыше-влакым чумырен. Ты сылне литератур касыш палыме да але веле возгалаш тӱҥалше автор-влак ушнышт. Тиде – Валентина Изилянова да Татьяна Пчёлкина, Вера Гордеева да Татьяна Соловьева,  Алёна Яковлева да Надежда Эмыкан, Татьяна Япаева да Татьяна Айтова, Эльвира Рыжова да Ирина Курочкина, Игорь Попов да Николай Любимов, Марина Чермакова да Вероника Мустаева, тыгак моло кумылан сылнымут деке лишыл еҥ-влак.
Чылан эн ончыч сылнымут кугорныш кузе толмышт нерген ойлен кодышт, шке нергенышт палдарышт. Сылнымут кугорныш лекташ марий йылмым туныктышо-влакын надырыштым пыштымышт нерген каласышт. Ятырын школышто тунемме годым марий йылме да литератур урокышто возаш тӱҥалыныт, манын палемдышт. «Ямде лий» газетын юнкорышт лийме нерген ойлышт. Вара «Марий Эл», «Кугарня» газет да «Ончыко» журналыш савыкталтмыштым шарналтышт.
Валентина Изилянова усталык корныжо нерген палдарымеке, самырык-влаклан сылнымут аланыште усталыкыштым шуараш тыланыш. Татьяна Пчёлкина сылнымут касше нерген ушештарыш, икмыняр самырык возышо-влак нерген ойлен кодыш. Поснак, Вера Гордеева да Ирина Курочкинам палемдыш.
«Ончыко» журналын ответственный  секретарьже Игорь Попов шке нергенже тыгерак каласыш: «Школыш кайыме деч ончычак, буквам сайын палыде возаш тӱҥалынам. Вара школышто рифмым тунемме годым кок корнаным возен толынам. Возаш туныктышем кумылаҥден. Образым кучылтмо нерген туныктен ойлен…Есениным лудынам да возаш сайрак тӱҥалынам…», – мане. Умбакыже В.Абукаев-Эмгакын поро тыланымашыжлан тауштыш, а журналист пашашке Володя Матвеев почеш толынам манын шижтарен каласыш.
Надежда Эмыкан ты кастене кидыктыже теве гына лекше у книгаже дене палдарыш, Алёна Яковлева мурызо корнышко лекмыжым шарналтыш.
Самырык возышо-влак ятыр йодышым нӧлтальыч. Писатель ушем гыч толыт гын, сай ыле, маньыч. Возкалымаш пашаште критике кӱлмӧ нерген каҥашышт. Тунамак критике «разумный дозышто кӱлеш», манын палемдышт. Серыме годым самоконтроль кӱлмӧ нерген ойлышт. Драматургийыште паша ятыр манын каласышт.
Татьяна Соловьева «Поэзий шепкаште» литератур клуб нерген ушештарыш. Самырык возышо-влакым у тунемме ий гыч литератур клубыш чумыргаш ӱжӧ да полшаш мутым пуыш.
21 шагат кастене М.Шкетан лӱмеш театрын артистше-влак Сергей Данилов да Марина Почтенева Валентина Михайдаровна Изилянован почеламут аршашше-влак негызеш келыштарыме «Вашлие мурышто кок чон» сылнымут-сылнесем моноспектакль семын шындыме композицийым моткоч сайын модын ончыктышт.
Иктешлен каласаш гын, С.Г. Чавайнын книгагудыштыжо вӱдшор тылзын 24-ше кечынже эртыше «Книгагудысо йӱд — 2015» («Библионочь – 2015») сылне уш-акыл пойдарымаш да шӱм-чон йодмо почеш каныме касыш ушнымаш нигӧмат книгагудо гыч яра колтен огыл. Кажныже шканже могай-гынат пайдам налын.
Тыгай сылне пайрем касым эртарымылан С.Г. Чавайн лӱмеш  книгагудышто тыршыше-влаклан моткоч кугу таум каласена.

«Кидшер» интернет-журналын коллективше

Кидшер
Шонымашым ешараш