«Кидшер» интернет-журнал кокымшо ий пашам ышта. Тиде жапыште тудо шуко лудшым муын. Мутлан, Вконтакте соцсетьыште «Кидшер» тӱшка уло. Тиде группыш кызыт 1000 утла еҥ подписатлалтын. Интернет-журналын тӱҥ редакторжо – самырык рвезе Николай Любимов.
«Кидшер» журналын шочмыж нерген ӱмаште мутланенна ыле. Тунам Н.Любимов палдарен: «2012 ийыште Токтарсола школышто Российысе марий самырык тукымын слётшо эртен. Тушто марий шӱлышан ӱдыр-рвезе-влак дене палыме лиймеке, чонем шулдыраҥмыла лийын, калыкемлан пайдам кондымем шуын да марий блогым ышташ шонымаш лектын».
Тыге «Илыш ик гана веле пуалтеш» блогшо шочын. Но Николай, пашажым эшеат чот кумдаҥдаш манын, марий сайтым ышташ шонен. Шонымашыжым илышыш шыҥдараш компьютер лингвист Андрей Чемышев полшен, да 2013 ий 15 декабрьыште «Кидшер» интернет-журнал пашам ышташ тӱҥалын. Эн нчыч увер-влак марла лийыныт гын, кызыт, марий тӱняште лийше событий-влак нерген чылан палышт манын, сайтын руш версийже ышталтын. «Сайтыште марий калыкын илыш корныжо, тӱвыраже, йӱлаж нерген кумданрак палдараш тыршена. Тидын годымак финн-угор калык-влак нерген ятыр статьям возена. «Кидшер» кок йылман интерфейс дене пашам ышта. Тидыже ик уверымак кок йылме дене пуаш йӧным ышта. Тӱрлӧ уверым Марий Эл гыч веле огыл, вес регион гычат чолга марий еҥ-влак чумыраш полшат. Мутлан, Татарстан гыч Софья Шарабуева материал-влакым колта. Одо кундем гыч – Виктория Папаева, — манеш журналын тӱҥ редакторжо.
— Блогым оксам ыштен налаш кучылтыт. Тидын шотышто могай паша ышталтеш?
— Сайтым але блогым ыштыме годым оксам ыштен налме нерген мондыман, очыни, вет тӱҥалтышыште шке кӱсен гыч шийвундым кучылтман. Поснак палемдынем: «Кидшер» казна гыч ик ырымат налын огыл. Сайтнан тӱҥ шонымашыже – оксам налаш огыл, а чын уверым вашке пуаш.
— Кызыт иктаж-могай проектым ямдылет?
-У проект-влак возалтыт, но калыклан тидым луктын ойлаш эше эр, шонем.
— Блогер семын вияҥаш мом ыштет?
— Тидын шотышто тӱрлӧ семинарыш коштмаш уке. Но мый лӱмлӧ да палыме еҥ-влак дене палыме лияш тыршем. Нунын дене мутланен, шукылан тунемам. Зоя Михайловна Дудинам моткоч пагалем. Тудо чынжымак калыкнан талешкыже. Поро кумылан, шыма койыш-шоктышан, уста еҥ. Самырык-влаклан каҥаш дене полшаш эре ямде.
— Тый МарГУ-со Калыкле тӱвыра да тӱвыра кокласе кыл институтышто тунемат, «Кидшер» Интернет-журналыш материал-влакым ямдылет, чон-кумыл пашалан жапет уло мо?
— Мый мураш моткоч йӧратем. Шочмо кундемысе Токтарсола тӱвыра пӧртын «Ош йӱксӧ» фольклор ансамбльын участникше улам. Тӱрлӧ районышко концерт дене коштам, ончыкшым вес кундемыш миен толаш шонем.
Шукерте огыл «ВийАр» ушемыш ушненам да тушто СМИ да общественность дене кылым ыштыме пашам шуктем.
Тачысе саманыште самырык еҥлан шийвундым ыштен налаш тыршыманак. Николай тӱрлӧ текстым марий йылмыш кусара. Тамада семынат пашам ышта, концертыш вӱдышӧ лияш ӱжыт гын, келша.
«Марий улмем дене кугешнем. Интернет-журнал, чон-кумыл пашам гоч Марий кундемем моктем. Марий йылмына кундемыштына веле огыл, тӱня мучко йоҥгыжо манын шонем», — ойла тудо.
Автор: Анастасия Эманова; Елена Рублёван фотожо.