«Мый марла ойлем!»,- ик предложений да кум мут гына. А могай сылнын тиде йоҥга?! Калыкна марла мутлана гын, йылмына аралалт кодеш. Марий йылмынам арален кодаш да вияҥден колташ манын, «Мый марла ойлем» акций ынде шымше гана эртыш.
Ты гана «Мый марла ойлем» акцийыш тӱрлӧ ийготан 100 наре еҥ ушнен. Эртен кайыше-влакланат оҥай лийын, да  нунат мероприятийыш уло кумылын ушненыт.
Организатор-влак «Мый марла ойлем!» акцийын палыже-влакым – значокым, «Руш-марий мутланымаш» буклетым да «Тыште марла мутланаш лиеш» наклейкым толшо-влаклан кучыктеныт, акций нерген каласкаленыт. 
Тений «Мый марла ойлем» акций ик тылзе шуйна. Самырык тукым кевытлашке, тунемме верлашке лектын коштыт, «Тыште марла мутланаш лиеш» наклейкым пуэдаш тӱҥалыт.
Тиде ийын акцийыш «Марий Эл» газетын редакцийжат ушнен. Газетын пашаеҥже-влак толшо-влак коклаште викториным эртареныт. Ойыртемалтше-влаклан марий календарьым пӧлекленыт.
Мероприятийым мурызо-влак Роза Искакова, Вадим Краснов, Сергей Пакеев, Артур Ефремов, Виктория Тихонова, бард Геннадий Григорьев, мурызо Лариса Сидоркина, Геннадий Куклин сӧрастареныт.
Акцийым  Марий Элысе тӱвыра, печать да калык-влакын пашашт шотышто министерстве, «Чарласе Кремль» тӱвыра да историй комплекс, «ВийАр» тӱвыра да келшымаш кыл ушем,  Республикысе Самырык-влакын Правительствышт – калык-влак кокласе кылым вияҥдыме шотышто группо, Республикысе Марий тӱвыра рӱдер эртареныт.

Каласен кодыман, «Мый марла ойлем» акций ынде итернетыштат уло, теат ушныза! «Кидшер» интернет-журнал тиде акцийым кумдаҥдаш шонен, тиде акцийым интернетыштат эртара. Тыгай йӧн дене ош тӱняште илыше кеч могай еҥ тиде акцийыш ушнен кертеш!

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.