Шочмо элын эрыкшым чолган арален!

Кугу Ачамланде сар годым совет калык, тудын сарзывийже Шочмо элын эрыкшым арален налын, кугу исторический сеҥымашым таптен да уло тӱня калыкым фашист куллык деч утарен. Марий-влакат изи огыл надырыштым сеҥымашке пыштеныт.
Ты гана Совет Союз Герой Алексеев Евсей Алексеевич нерген «Ме шарнена» интернет-проектыштына каласкалена.
Евсей Алексеевич 1921 ий 21 декабрьыште Мари-Турек районы Сардаял ялыште шочын. Шуко жап колхозышто пашам ыштен.
1940 ийыште Йошкар Армийыш налыныт. Фронтышто — 1941 ий 22 идым гыч. Евсей Алексеевич Алексеев немыч оккупант-влак ваштареш кучедалмаштылаште, тушманын техникыжым да сарзыштым пытарымаште лӱддымылыкым да чолгалыкым ончыктен. Тудо Кеывалвел, Кечывалвел-Касвел, Брянский фронтлаште кучедалын, Курский кучедалмаште чолгалыкым ончыктен.
Гомельский область, Комаринский район воктен Днепр эҥерым вончымаште 76-шо гвардейский Черниговский стрелковый дивизийын 154-ше гвардейский артиллерийский полкын артиллеристше Е. А. Алексеев лӱддымылык ден патырлыкым ончыктен.
1943 ий 30 августышто чолга артиллерист шке орудийный расчетшо ден пырля Днепр эҥерын пурла серышкыже икымше радамыште вончен. Икымше кредалмаштак 30 фашист ден пулеметым пытарен, минометный батарейын тулжым йӧрыктен.
1943 ий 1 октябрьыште расчетшо ик эн ончыч эҥерысе кокымшо вӱд авыртыш гоч вончен, гитлеровец-влакым тура лӱйыштын, нунын ваштареш шогалме кок керылтмашыжым мӧҥгештарен сеҥен.
1944 ий 15 январьыште Е. А. Алексеевлан Совет Союз Герой лӱмым пуымо.
Евсей Алексеевич Белоруссийым, Польшым утарымаште кучедалын. Берлинын штурмжо дене шке неле сарзе корныжым пытарен.
Тудо «За отвагу», «За победу над Германией», «За оборону Одессы», «За оборону Сталинграда», «За взятие Берлина» медаль-влак дене палемдалтын.
Сар деч вара шочмо Сардаялышкыже пӧртылын, совхозышто трактористлан пашам ыштен. Чаманен каласаш логалеш, 1979 ий 10 кылмыште шӱмжӧ кырымым чарнен. Мари-Турек район Мамсинер ялын шӱгарыштыже тойымо.

Материыалым ямдылыме годым
С. Г. Чавайн лӱмеш калыке книгагудын сайтшылан эҥертыме.

Кидшер
Шонымашым ешараш