Уста поэтым шарнен…

Валентин Колумб — тале шымлызе, шочмо йылмыжын тамжым да ямжым возышо мастар лийын. Марий йылмын сылнылыкшым поснак умылен моштен. Поэт марий мутвундым пойдарымаш верч толкыным тарватен, поэзийже ден илышым вораҥдаш, тӱвырам нӧлташ лым лийде тыршен.
«Колумб лудмаш» оласе поэзий конкурс 21 майыште Йошкар-Оласе 14-ше №-ан гимназийыште  эртыш. Тышке, 37 йоча,  самырык еҥ ушныш. Колумбын почеламутшо-влак марла йоҥгышт, рушла лудшо-влакат лийыч. 
Чумыргышо-влакым Республикысе марий тӱвыра рӱдерын директоржо  Наталья Пушкина, Валентин Колумб лӱмеш рӱдер-тоштерым вуйлатыше Владимир Козлов пайрем дене саламленыт.
А конкурсыш ушнышо-влакым пагалыме жюри еҥ-влак акленыт. Тиде жюри вуйлатыше — Маргарита Егоровна Медикова (Россий Федерацийын сулло артистше, Марий Элын калык артистше), Людмила Ивановна Кошкина (Россий Федерацийын кӱшыл профессионал образованийын сулло пашаеҥже, Республикысе марий тӱвыра рӱдерын тӱвыра да каныш пӧлкам вуйлатыше) да Соловьёва Татьяна Анатольевна, Марий кугыжаныш университетын меркыл службын корреспондентше, Олык Ипай лӱмеш кугыжаныш премийын лауреатше, марий поэтесса, мурызо.
Конкурсыш ушнышо-влакым кок номинаций дене акленыт.
_DSC4244«Колумбын сылнымутшым сӱрет гоч ончыктымаш» номинаций заочно эртен. Чаманен каласаш логалеш, тиде ийын кум паша гына пурен. Сандене организатор-влак верым ойырен огытыл, чылалан сертификатым кучыктеныт.
«В.Колумбын почеламутшым сылнын лудмаш» номинацийым ийгот кышкар дене шелме. 12 ий марте 21 йоча лийын. Тиде ийгот кышкарыште 3-шо верым Головина Анна (1-ше №-ан кыдалаш школ, вуйлатыше — Валентина Ивановна Рыбакова) налын, 2-шо верым Павлова Софья (14 №-ан гимназий, вуйлатыше — Раисия Арсентьевна Шабдарова) сулен, 1-ше вер дене Филатова Арина (20-шо №-ан кыдалаш школ, вуйлатыше — Людмила Иосифовна Ярославцева) аклалтын.
13-18 ияш коклаште 10 еҥ лийын. Кумшо верым Васильева Ольга  (14-ше №-ан гимназий, вуйлатыше Никитина Людмила Ивановна), сеҥен налын. Кокымшо вер дене Иванова Анна (21-ше №-ан школ, вуйлатыше — Васенина Оксана Николаевна). Икымше верым — Кугергина Ириналан (21-ше №-ан школ, вуйлатыше — Васенина Оксана Николаевна) пуымо.
18 ий деч кугурак ныл еҥ ушнен. 1-ше вер дене Христина Ивановам (МарГУ, ИНКиМК, вуйлатыше Малинина Светлана Александровна) суапландаралтын.
Конкурсын кажне участникше сертификат да изирак пӧлек дене палемдалтын. А сеҥыше-влакым Чап танык да шерге пӧлек дене палемдыме.
Пайремым Республикысе марий тӱвыра рӱдер эртарен. Окса полыш дене Йошкар-Оласе тӱвыра виктем полшен.
Икымше верыш лекше-влак Йошкар-Олан чапшым Республикысе «Колумб лудмаш» поэзий конкурсышто аралаш тӱҥалыт. Ты конкурс 26 июньышто Морко районысо Пумор ялыште лиеш. Тений тудо 26-шо гана эртаралтеш.

konkurs26

Автор: Николай Любимов,
«Кидшер» интернет-журналын тӱҥ  редакторжо

Кидшер
Шонымашым ешараш