Пеледыш пайрем — марий калыкын ик эн йӧратыме да вучымо пайремже. А паледа мо те, икымше гана Пеледыш пайрем 1920 ийыште Йошкар Пеледыш пайрем лӱм дене Шернур селаште эртаралтын.
Тылеч вара Пеледыш пайрем Татарстан, Башкортостан республиклаште, Киров, Екатеринбург областьлаште, Моско, Санкт-Петербург, Пермь, Чебоксар олалаште да тулеч моло вереат эртен.
Ты пайрем пашам чаплын шуктышо калыкым саламла, марий айдемылан марий улмыжым шижаш, умылаш полша, иктеш ушнен. йылмым, муро, куштымаш поянлыкшым, сылне вургем ойыртемжым аралаш кумылаҥында. 
Моло калык дене пырля келшен илаш ӱжеш.
Тений тиде сылне пайрем 25 июньышто Йошкар-Олаште эрта. Пайрем мероприятий Йошкар-Оласе Тумер отышто 9 шагатлан тӱҥалеш. Тыште Агавайрем лиеш.
Пайремыште «Марий кудо», «Йоча вургем», «Марий ÿдыр», «Эх кувавай!» «Онарын тукымжо» да«Марий солык»конкурс-влак эртат.
Марий Элысе да моло регионла гыч фольклор коллектив-влак шке мастарлыкыштым ончыктат. Тидын годымак, «Йыр куштымаш» да «Марий кас» лиеш.
Пайрем Ленин лӱмеш площадьыште, марий дискотеке дене мучашлалтеш.
Организатор-влак: Республикысе марий тӱвыра рӱдер, Марий Элысе тӱвыра, печать да клак-влакын пашашт шотышто министерстве, Ялозанлык министерстве, Мер Каҥаш.
Йоҥгалт, чаплане, Пеледыш пайрем!
