Тений, уржа тылзыште Финляндийын лу утла олаштыже самырык финн «Йӱк» коллективын «Марий мландыш унала» концертше-влак лийыт. «Йӱк» коллективыште Европын тӱрлӧ эллаштыже илыше (Финляндий, Англий, Германий, Франций, Швеций) 6 музыканче кызытсе классический композитор-влакын (Г. Ф. Хаас, Ф. Донатони, Я. Ксенаксис, Дж. Л. Адамсын) произведенийыштым шокташ тӱҥалыт. 
Кок финн композиторым моткоч марий сылнымут, мемнан калык да кундемна дене кылдалтше фото-влак марий илыш нерген сылнысем композицийым возаш кумылаҥденыт. Концерт эртыме годым ончаш толшо-влак марла мутланымым колыштын кертыт, тыгак родо-тукым йылмын икмыняр мут-влакым тунемашышт йӧн лиеш.
«Марий мландыш унала» концертын идейже «Йӱк» коллективым чумырышо самырык финн пианист Вяйнё Ялканенын. Тудо шкеже Берлин ола гыч. Вяйнё Ялканен финн-угор калыкын йылмышт ден культурыштым эреак шымла. 2014 ийыште Будапешт университетыште тудо марий йылмым пел ий тунемын. Марий тӱвыран сылнылыкше дене палыме лиймеке, тудым моткоч пагален, аклен, музыкант шке йолташ-влакше дене пырля Финляндийыште илыше шукырак калыкым мемнан илышна нерген, тӱняумылымашна нерген палдараш шонен пыштен. Марий да финн калык коклаште тӱвыра аланыште эше ик «кӱварлан» тиде концертым шотлаш лиеш, манына гын, йоҥылыш она лий.
Творческий пашашке самырык уста фотограф Меери Коутаниеми ушнен. Меери тений 12 гыч 17 май марте Марий Элыште уна лийын. Тудын мемнан кундемыште ыштыме 20 фотожым «Йӱк» коллективын концертше годым калыклан ончаш луктыт. Меери Коутаниеми курыкмарий ял дене палыме лийын, Йошка-Олаште марий творческий интеллигенций дене вашлийын, тыгак Морко кундемысе Унчо ялыште марий суртышто илен ончен.
Кызыт тиде проектым илышыш шыҥдараш кугу паша ышталтеш. «Коне» финн фонд тиде проектым сайлан шотлен да илышыш шыҥдараш полша.

«Кидшер» интернет-журналлан лӱмын
Татьяна Ефремова ямдылен.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.