Кеҥеж пагыт пайрем да фестиваль-влаклан поян. Пеледыш тылзын кудымшо кечынже Марий Элысе Юлсер кундемыште «Элнет кундем – мастар кундем» («Край Илетский – край мастеров») фестиваль ятыр калыкым чумырен, а пошкудо Киров область Уржум районысо Поса селан тӱвыра полатыштыже тиде кечынак марий композитор Д.М. Кульшетовын усталыкшылан пӧлеклалтше VIII регион-влак кокласе «Илыш мучко муро дене» калык муро фестиваль-конкурс эртен. 
Музыковед, Россий композитор-влак Ушемын еҥже, Марий Элын сулло пашаеҥже, фольклорист Дмитрий Михайлович Кульшетовын шочмо-кушмо верже Поса (рушлаже Байса) села улеш. Садлан тиде верысе тӱвыра пӧрт кандашымше гана фестиваль-конкурсыш марий мурым йӧратыше-влакым поген.
Дмитрий Кульшетов коло утла марий калык муро сборникым чумырен, муро фольклор нерген ятыр пашам возен. Кызытат марий фольклор коллектив-влак тудын погымо муро поянлыкшым кучылтыт. Фестивальын кугу унаже – Дмитрий Михайловичын эргыже, Марий Элысе композитор-влак Ушемым вуйлатышыже, Россий Федераций да Марий Элысе сымыктышын сулло пашаеҥже Валерий Дмитриевич Кульшетов лийын.
Тений VIII-ше фестиваль-конкурсышко Виче кундем гыч 4 да Марий Эл гыч 6 коллектив ушнен. Пайремым Поса селасе тӱвыра пӧрт пеленысе «Марий шӱшпык» да «Вӱд тӱр воктен» мурен-куштышо йоча коллектив-влак почыныт.
Конкурсым иктешлымеке, кажне номинацийыште сеҥышым палемденыт. Тыге I верыш «Ансамбль» номинацийыште «Савак кундем» калык фольклор ансамбль (Марий Турек,Сысоево тӱвыра полат) лектын. II вер дене «Марий сем» мурышо ансамбль (Марий Турек тӱвыра полат) палемдалтын, III верыште – «Какшан сем» фольклор ансамбль (Оршанка,Кугунур тӱвыра полат) да «Ший оҥгыр» (Шернур, Кукнур тӱвыра полат).
«Соло» номинацийыште I верым Лариса Пектубаевалан, «Савак кундем» калык фольклор ансамбльын солисткыжлан пуэныт, II вер дене Фадеева Зоям, «Поса кундем» ансамбльын солисткыжым палемденыт, III верым Наталья Богданова, Кугунур селасе «Какшан сем» ансамбльын солисткыже сулен налын.
Кужеҥер районысо Токтайбеляк тӱвыра полатын «Ший аршаш» фольклор ансамбльжылан Уржум район тӱвыра виктемын таумутшым кучыктеныт.
«Илыш мучко муро дене» калык муро фестиваль-конкурсыш ушнышо кажне коллективым, посна участник да организатор-влакым Марий Эл композитор Ушемын да Уржум район тӱвыра виктемын дипломжо да таумутшо дене палемденыт.
Сылне пайрем-кас Марий Эл гыч мийыше артист-влакын концертышт дене мучашлалтын.

Автор: Николай Любимов,
«Кидшер» интернет-журналын тӱҥ редакторжо.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.