Марий Эл Радиолан 10 ият темеш. 2005 ий 1-ше июльышто, икымше гана, эфирышке Мурызо Эчан (Александр Кожевников) лектын. «Поро эр, Марий Эл», — Александр пелештен. Тачысе кечылан радиошто Володя Матвеев, Марина Глушкова, Александр Кожевников,Ирина Якаева, Владимир Аптулаев, Людмила Карпова, Михаил Пирогов да Сергей Карпов тыршат.
Марий Эл Радиом таче ятыр тӱжем ешыште эр гыч кас марте колыштыт. А кушто гына радион йӱкшӧ огеш шокто: мӧҥгыштӧ, пашаште, машина дене кудалме годым, сад-пакчаште, эсогыл тӱрлӧ-тӱрлӧ предприятийыштат Марий Эл Радион йӱкшӧ йоҥга. Эфирыште тӱрлӧ виктышыште, сферыште тыршыше еҥ-влак дене программым колышташ лиеш. Вӱдышӧ-влакат калыклан оҥай программым ямдылаш тыршат, эфирыште тӱрлӧ сынан марий муро йоҥга, оҥай конкурс-влак эртаралтыт.
Марий Эл Радио пӱтынь Марий кундемым авалта, но радиом вес эллаштат интернет полшымо дене колыштыт. Мутлан, мемнан сайтыштат Марий Эл Радиом колыштын кертыда. Колышташ »
Марий Эл Радио марий сынан CD, mp3, DVD диск-влакым калыклан темла. Калыкыште Марий Эл Радио тӱрлӧ концертым эртарыме дене палыме. 2010 ий гыч «Идалыкысе муро» концерт-фестиваль, Пеледыш пайремыште марий танцполым эртарат. Тыгак ятыр ий районлашке тӱрлӧ сынан концерт-программе дене лектын коштедат. Ынде лу ий кажне кеҥежым калыкым Йошкар-Оласе стадиондаште чумырат: ончыч «Строитель» стадионышто погыненыт, калык шуко погынымылан кӧра, пытартыш вич ий «Келшымаш» стадионышто марий шӱлыш озалана.
Теният тыгай пайрем 1 августышто «Келшымаш» стадионышто эрташ тӱҥалеш.
Кажне ийын концерт-программе оҥайын эртаралтеш. Концертын организатор-влакын мутышт почеш, ончаш толшо-влакым фольклор, шуко у эстраде муро, мурызо куандараш тӱҥалыт. Тугеже толза «Келшымаш» стадионышко 1 августышто, концерт 17 шагатлан тӱҥалеш. Билетым ончылгоч налашлан йыҥгыртыза: 63-03-81, 63-03-65, 63-04-66.
Автор: Николай Любимов,
«Кидшер» интернет-журналын тӱҥ редакторжо.