Сар… — шучко, нигӧлан кӱлдымӧ неле саман. Мутшак чоным туржшо, кочо, шинчавӱд йӧршан.
1941 ийыште 22 июньышто 4 шагат эрдене Кугу Ачамланде сар тӱҥалын. Кеч-могай сар шуко еҥым тулыкеш кода, ятыр самырык илышым пеленже наҥгая. 1418 кече ден йӱд мучко шуйнышо сар 20 утла миллион ӱдыр ден эргыжым пытарен.
Шочмо элна верч вуйым пыштыше-влаклан Йошкар-Олаште 4 шагат эрдене «Сортам чÿктö» акций эртыш. Ты акцийыш чумыргышо-влак сортам чӱктышт, пеледышым пыштышт.
Ты акцийыш Марий Эл Республикысе Кугыжаныш Погын вуйлатыше Юрий Минаков ушнен. Тудо самырык тукымлан, кугезе кочана-кована-влакын пашаштым шарнен илымылан тауштен, тыныс илышым тыланен.
Ушештарена, «Кидшер» интернет-журналыште «Ме шарнена» интернет-проект кая. Ончаш »
22 июнь марте, сарын геройжо, ветеранже-влак нерген палдаренна гын, ынде 1 сентябрь марте «Писатель-фронтовик» циклым лудашда темлена. Октябрь тылзыште гын, «Сеҥымаш фотоальбомым» сайтыштына вераҥдена. Ноябрь тылзыште «Тачысе герой-влак. Могай нуно улыт?» теме дене йыргешке ӱстел погына.
Ты интернет-проектыш тендамат ушнаш ӱжына. Сар нерген шке шонымашдам але сарыште лийше, фронтлан полшышо еҥ-влак нерген материалдам info@kidsher.ru электрон почтышкына вучена.
Автор: Николай Любимов,
Сергей Бабиковын фотожо-влак.