1945 ийыште чапым налше тиде пайрем, калык муро семын, курым гыч курымыш сескемалт вончаш тӱҥалеш. Тудым чакемдаш ныл ий чоло шуйналтше, орлыкан, тӧрсыр корно ӱмбалне вӱран фашизм дене эн патыран совет калык кредалын да коло миллион ӱдыржӧ ден эргыжым сар тулеш йомдарен, мучашлыме ойго-йӧсым чытен лектын да кугу элнам арален коден. Нунын радамыште Марий кундемын мутмастарже-влакат лийыныт. 
«Ме шарнена» интернет-проектнам умбакыже шуэна. Да ик тыгай чолга мутмастар Аркадий Степанович Крупняков нерген каласкалнена.
Аркадий Степанович кресаньык ешеш шочын. Шым классым пытарымеке паровоз машинистлан тунемаш пурен, тыгак механикын полышкалышыжлан кӱртньӧ корнышто пашам ыштен.
Идым тылзын 1942 ийыште Йошкар Армийыш каен. Кугу Ачамланде сар годым Аркадий Степанович командир пӧлка лийын, тыгак политрук ротын алмаштышыже, взводын командирже, фронт газетын корреспондентше. 1942 ийыште Ленинград фронтыште сарлыме годым, бой коклаште тудо возен шке икымше приключенческий повестьым «Белые ночи». Сар деч вара Аркадий Крупняков Марий Эл да Татарстан икмыняр газетыште тыршен. 50-ше ийла тӱҥалтышыште тудо Белогорск олашке илаш вончен да «Крымская правда» газетыште пашам ышташ тӱҥалын.
Тиде жап гыч Аркадий Степанович исторический романым возаш кумылаҥын. 1961 ийыште лектын икымше роман «У моря Русского». Тиде роман А.С. Крупняковлан лӱм-чапым конден. 1968 ийыште Аркадий Степанович СССР писатель ушемыш пурен. Вара писатель «Марш Акпарса», «Лада», «Раскол», «Есть на Волге утёс», трилогий «Гусляры» произведенийым воза. Нунын коклаште шукыжын историй жанрыште возымо улыт. Тыгак Аркадий Степанович икмыняр пьеса-влакым возен, кудым ончышо-влак Йошкар-Оласе Руш Драме театрыште куанен ончат. «Расплата» пьесе почеш спектакль I-ше степенян дипломым Всесоюный драматический театр ончымашыште Моско олаште налын. «Марш Акпарса» почеш постановка Руш Драмтеатрын шӧртньӧ фондышкыжо пурен. 1989 ийыште Йошкар-Олаште икымше фантастикысе роман А.С. Крупняковын «Амазонки» лектын, а 1993 ийыште «Амазонка-влакын» шуйнымаш – «Пояс Ипполиты». Тиде пытартыш произведений А.С. Крупняковын лийын. Кызыт Аркадий Степановичын пашажым тудын эргыже шуя, Россий да Украинын писатель Ушемын членже Сергей Аркадьевич Крупняков. Кызыт тудо еш дене Севастополь олаште ила.
«Кидшер» интернет-журналын лудшыжо-влакым «Ме шарнена» интернет-проектыш тендамат ушнаш ӱжына. Сар нерген шке шонымашдам але сарыште лийше, фронтлан полшышо еҥ-влак нерген материалдам info@kidsher.ru электрон почтышкына вучена.

Материалым ямдылыме годым Марий Википедийлан эҥертыме.

ВАШМУТЫМ КОДЫЩА

Please enter your comment!
Please enter your name here

Лимит времени истёк. Пожалуйста, перезагрузите CAPTCHA.