Лариса Яковлева: Самырык ӱдыр-рвезе-влакым саламлем!

Марий рвезе тукымым Россий кӱкшытан VII Марий самырык тукым слет почмо дене Россий Кугыжаныш Думын депутатше, Лариса Яковлева саламла. Слет 8 гыч 12 июль марте Провой кундемысе Чакмарий селаште эрта.
Российысе шымше марий самырыктукым слетыш чумыргышо пагалыме ӱдыр-рвезе-влак!
Тачысе кугу форумын темыже — «Пушеҥгын вийже – вожышто, калыкын – у тукымышто». Тышке шке калыкым йӧратыше, тудын ончыкылыкшо верч тургыжланыше самырык ончылъеҥ-шамыч чумыргенда. Те кажныже Российын тӱрлӧ кундемыштыже иледа гынат, чыланат мыланна эн шерге, кӱлешан чинче пырче улыда. Тӱнямбалне марий калык семын аралалт кодмаш тендан уш-акылда, вий-куатда, шонен моштымыда дене чак кылдалтын. Сандене чыла тидын пеҥгыде рӱдыжӧ лийже.
Шочмо йӱлам, йылмым йӧратымаш да пагалымаш еш гыч тӱҥалеш. А еш тунам пеҥгыде да пиалан лиеш, кунам тушто икте-весым умылен, эҥертыш лийын моштымаш озалана.
Тачысе самырыктукым жап ден тӧр ошкылын мошта. Тек тиде ошкыл шочмо калык дене пырля лиеш.

Слёт гыч кугу фотоальбом:

РФ Федераций Советын Кугыжаныш Думыжын Еш, ӱдырамаш ден йоча-влак йодыш шотышто комитет председательын алмаштышыже, «Единый Россий» фракцийын членже Л.Яковлева.

Йолташ-влаклан палдараш
Кидшер
Шонымашым ешараш